Programi i kontrollit shëndetësor bazë, check-up, vjen me një risi duke u ofruar falas, që prej muajit shtator, për të gjithë qytetarët e moshës 35 vjeç e lart, pa një kufi maksimal moshor.

Drejtoresha e Institutit të Shëndetit Publik, Dorina Toçi, përmes një videomesazhi u bëri thirrje qytetarëve mbi 35 vjeç të përfitojnë nga programi dhe të kryejnë kontrollin pranë qendrës së tyre shëndetësore.

Sipas Toçit, rëndësia e check-up-it lidhet me parandalimin dhe identifikimin e hershëm të problemeve shëndetësore, përpara shfaqjes së shenjave apo simptomave.

“Vlera e programit të check-up-it qëndron tek parandalimi dhe zbulimi i hershëm i problemeve shëndetësore, pa pasur ende asnjë shenjë apo simptomë”, theksoi ajo.

Përtej përfitimit individual, Toçi vuri në dukje edhe rëndësinë e programit për shëndetin publik, pasi të dhënat e mbledhura nga kontrollet do të ndihmojnë në krijimin e një pasqyre më të plotë mbi gjendjen shëndetësore dhe faktorët e rrezikut të popullatës që kryen check-up-in.

Këto të dhëna, sipas saj, do të shërbejnë për orientimin e programeve të parandalimit dhe hartimin e politikave të reja shëndetësore.

“Instituti i Shëndetit Publik vjen me një thirrje për të gjithë qytetarët. Nëse jeni mbi 35 vjeç, paraqituni pranë qendrës tuaj shëndetësore dhe kryeni check-up-in”, u shpreh Toçi.

Programi synon kështu të forcojë qasjen parandaluese në kujdesin shëndetësor, duke nxitur kontrollet periodike dhe identifikimin në kohë të faktorëve të rrezikut dhe problemeve shëndetësore.

“Parandalimi dhe zbulimi i hershëm zgjat jetën dhe përmirëson cilësinë e saj”, përfundoi ajo.