Ministria e Turizmit, Kulturës dhe Sportit dhe Fakulteti i Gjuhëve të Huaja në Universitetin e Tiranës nënshkruan një marrëveshje bashkëpunimi, me synim forcimin e partneritetit institucional për zhvillimin e kapitalit njerëzor në sektorin e turizmit.

Marrëveshja u firmos nga ministri i Turizmit, Kulturës dhe Sportit, Blendi Gonxhja,dhe dekania e Fakultetit të Gjuhëve të Huaja, prof. dr. Esmeralda Kromidha.

“Përmes kësaj marrëveshjeje synojmë të krijojmë mundësi të reja për përgatitjen profesionale të studentëve, zhvillimin e aftësive dhe kompetencave të tyre, si edhe promovimin e standardeve të komunikimit shumëgjuhësh në industrinë turistike”, tha Gonxhja në një postim në rrjetet sociale.

Sipas tij, ky bashkëpunim pasqyron angazhimin tonë për të afruar arsimin me tregun e punës dhe për të investuar në burimet njerëzore, si një nga shtyllat kryesore për rritjen e cilësisë së shërbimeve dhe zhvillimin e qëndrueshëm të turizmit shqiptar.

Marrëveshja u nënshkrua në një kohë kur sektori i turizmit në Shqipëri po njeh rritje të vazhdueshme të numrit të vizitorëve, duke rritur edhe kërkesën për burime njerëzore të kualifikuara.

Përmes këtij partneriteti synohet përgatitja e profesionistëve me kompetenca gjuhësore dhe profesionale, të aftë për t’iu përgjigjur standardeve të turizmit dhe nevojave të një tregu gjithnjë e më konkurrues.

Burimi ATSH