Agjencia për Media dhe Informim (AMI) dhe Ministria e Mjedisit i cilësuan informacione të pavërteta lajmet që po qarkullojnë në media lidhur me projektin turistik në zonën e Zvërnecit.

Përmes një njoftimi zyrtar për mediat, AMI bëri të ditur se gjatë një takimi online të zhvilluar më 26 maj me përfaqësues të Komisionit Europian, ministri i Mjedisit, Sofjan Jaupaj, ka informuar zyrtarët europianë mbi statusin aktual të projektit.

“Gjatë një takimi online më 26 maj me përfaqësues të Komisionit Europian, ministri Jaupaj informoi Komisionin se aktualisht nuk ekziston një projekt përfundimtar i miratuar dhe nuk ka asnjë projekt në ndërtim”, thuhet në njoftimin e AMI-së dhe Ministrisë së Mjedisit.

Ministri i Mjedisit ritheksoi angazhimin e Shqipërisë për të garantuar që çdo projekt i mundshëm zhvillimi i nënshtrohet një vlerësimi të plotë dhe të përgjegjshëm mbi ndikimin në mjedis të zhvilluar me transparencë të plotë dhe me konsultim publik.

“Shqipëria mbetet plotësisht e angazhur ndaj procesit të anëtarësimit në BE. Si pjesë e kritereve te Kapitulit 27 për Mjedisin dhe Ndryshimit Klimaterike. Shqipëria duhet të arrijë përafrimin ep-lotë me legjislacionin e mjedisit të BE. Qeveria mbetet e vendosur pët të respektuar dhe zbatuar këto detyrime”, thuhet në njoftimin e AMI-t.

Burimi ATSH