Spitali Bashkiak Mirditë po transformohet në një qendër rajonale të traumës dhe rehabilitimit, një model i ri funksional spitalor për Veriun e Shqipërisë, në kuadër të reformës së re spitalore.

Pavioni i ri i Traumës, me fokus trajtimin e ndërhyrjeve të planifikuara traumatologjike dhe rehabilitimin e pacientëve, do të sjellë shërbime të specializuara më pranë qytetarëve dhe njëkohësisht synon të ulë fluksin në spitalet terciare, veçanërisht në Spitalin Universitar të Traumës në Tiranë.

Ministrja e Shëndetësisë dhe Mirëqenies Sociale, prof. Evis Sala dhe Ministri i Mbrojtjes, Ermal Nufi, inspektuan Pavionin e ri të Traumës në Spitalin Bashkiak Mirditë, ku theksuan se ky investim synon të fuqizojë kapacitetet e trajtimit të specializuar në nivel rajonal dhe të krijojë një pol të rëndësishëm shërbimesh për zonën veriore të vendit.

“Ky projekt transformimi në Spitalin Bashkiak Mirditë është pjesë e reformës së gjerë spitalore për të krijuar një shërbim më të specializuar rajonal për Traumën, ortopedinë dhe rehabilitimin, për t’i shërbyer më mirë pacientëve. Ky transformim ka dy qëllime kryesore: forcimin e sistemit spitalor të specializuar, duke krijuar një pol verior dhe së dyti po aq i rëndësishëm, decentralizimi i këtyre shërbimeve nëpërmjet fuqizimit të kapaciteteve rajonale”, theksoi ministrja Sala.

Duke vlerësuar pozicionin gjeografik të Mirditës, ministrja Sala tha se vënia në funksion e këtij pavioni do të bëjë të mundur ofrimin e trajtimit të specializuar më pranë qytetarëve duke synuar dhe uljen e ngarkesës së spitaleve terciare, veçanërisht të Spitalit Universitar të Traumës, ndërsa theksoi se vijon puna për vlerësimin e zonave të tjera në vend.

“Ky është vetëm fillimi, pasi do të vlerësojmë edhe spitale të tjera nga ana gjeografike dhe e kapaciteteve për të krijuar një model të ngjashëm në zona të tjera të Shqipërisë. Synimi është ofrimi i shërbimeve të specializuara, jetike, sa më pranë pacientit” – theksoi ministrja Sala.

Ndërsa, ministri i Mbrojtjes, Ermal Nufi u ndal në rëndësinë e bashkëpunimit ndërinstitucional për zgjerimin e aksesit dhe ofrimin e shërbimeve shëndetësore sa më pranë pacientëve, përmes koordinimit të strukturave civile dhe ushtarake.

“Në kuadër të reformës dhe rishikimit të marrëveshjes që kemi me Ministrinë e Shëndetësisë, do të kemi mundësi që jo vetëm shërbimet e Spitalit të Traumës, por edhe shërbimet të tjera të përfitohen si nga personeli ushtarak ashtu edhe ai civil, qytetarët, pranë të gjitha infrastrukturave që do të bashkëpunojnë në raport me shërbimet shëndetësore, në të gjithë Republikën e Shqipërisë”, tha ministri Nufi.

Projekti parashikon ngritjen dhe fuqizimin e shërbimeve të ortopedisë, fizioterapisë dhe rehabilitimit, zgjerimin e kapaciteteve kirurgjikale dhe anestezi-reanimacionit, si dhe mbështetje me telemjekësi për imazherinë.

Ky investim pritet të sjellë rritje të cilësisë dhe eficiencës së shërbimit spitalor, trajtim më të shpejtë të traumave, reduktim të referimeve drejt spitaleve rajonale dhe universitare, si dhe përmirësim të rehabilitimit të pacientëve në nivel vendor.

Burimi ATSH