Bashkëpunimi mes Italisë dhe Shqipërisë për parandalimin dhe rritjen e ndërgjegjësimit të qytetarëve për kujdesin shëndetësor vijon të forcohet.

Ministria e Shëndetësisë dhe Mirëqenies Sociale njoftoi sot se, në kuadër të këtij bashkëpunimi, në portin e Durrësit u ankorua anija e shëndetit “La Nave della Salute”, nismë e One Health Foundation, që sjell shërbime të parandalimit dhe kujdesit shëndetësor më pranë qytetarëve të cilët udhëtojnë në dy anët e Adriatikut.

Kryefjala e projektit është parandalimi, i cili, në këtë vizion, nuk mbetet i kufizuar te një kontroll i vetëm mjekësor. Ai bëhet një rrugëtim i përbashkët, i përbërë nga screening, informim, kërkim, trajnim dhe bashkëpunim mes profesionistëve.

Ministrja e Shëndetësisë dhe Mirëqenies Sociale, Evis Sala vizitoi nga afër mjediset e anijes të përshtatura për kontrolle mjekësore. Ajo takoi ekipet italiane të shëndetësisë, ku theksoi rëndësinë e këtij bashkëpunimi si një vlerë e shtuar për shëndetin publik, duke hapur rrugën për mbështetje konkrete në rritjen e kapaciteteve mjekësore gjatë sezonit turistik.

Ministrja Sala solli edhe një histori personale dhe profesionale që lidh Shqipërinë me Italinë. Para detyrës institucionale, ajo ka punuar në mjekësinë klinike dhe në kërkim shkencor, me një përvojë të rëndësishme në Policlinico Gemelli, ku ka mbajtur rolin e përgjegjëses së Qendrës së Diagnostikës për Imazhe dhe Radioterapisë Onkologjike, si dhe pedagoge në universitetin përkatës. “Një pjesë e madhe e zemrës sime mbetet te mjekësia”, kujtoi ajo, duke theksuar sa shumë ka ndikuar ky rrugëtim në idenë e saj për shëndetin publik.

Sot, në Shqipëri, sfida është ta bëjë parandalimin një shtyllë të sistemit shëndetësor.

Për Rossana Berardi, presidente e One Health Foundation dhe presidente e zgjedhur e AIOM, ndalesa shqiptare përfaqëson zhvillimin natyror të projektit. “Nga ky takim, – shpjegoi Berardi, – mund të lindë një bashkëpunim më i strukturuar, i përqendruar te kultura e parandalimit dhe te shëndeti i qytetarëve në të dy brigjet e Adriatikut. Ideja është të ndërtohet një rrjet mes Italisë dhe Shqipërisë, edhe në fushën onkologjike, duke vlerësuar lidhjen ekzistuese me rajonin e Markeve, ku jeton një komunitet i madh shqiptar dhe ku shumë qytetarë me origjinë shqiptare ndjekin trajtime në strukturat shëndetësore rajonale.”

Edicioni i tretë i “Nave della Salute” solli në bord 17 mjekë dhe 10 ambulanca, të cilët për dy ditë do të ushtrojnë kontrolle parandaluese për pasagjerët e linjës Ankona–Durrës. Një model i lindur për t’i afruar njerëzit me kontrollin shëndetësor dhe stilin e duhur të jetesës, që tani synon të bëhet një rrjet ndërkombëtar i shëndetit publik.

Dita e dytë e “Nave della Salute” pritet të konkretizohet dhe me nënshkrimin e një memorandumi mirëkuptimi mes Università Politecnica delle Marche, e drejtuar nga rektori Enrico Quagliarini, dhe Universitetit të Mjekësisë në Tiranë. Marrëveshja lind nga takimet institucionale të nisura në edicionet e mëparshme dhe synon të promovojë projekte të përbashkëta në kërkim, mësimdhënie dhe bashkëpunim shëndetësor.

Në kuadër të këtij projekti, në javët në vijim do të organizohen takime dypalëshe ndërmjet ekspertëve nga të dy vendet dhe do të hapen kurse trajnimi për mjekët e rinj. Gjithashtu, do të zhvillohen shkëmbime shkencore, broshura, webinar-ë dhe evente të tjera informative kushtuar qytetarëve.

Burimi ATSH