Kryetari i Kuvendit, Niko Peleshi, zhvilloi një takim me ambasadorin e Bashkimit Europian në Shqipëri, Silvio Gonzato, përfaqësuesen e Zyrës Rajonale të Parlamentit Europian në Tiranë, Tatiana Mrazikova, si dhe përfaqësues të ekipit IDEA +7.

Gjatë takimit në ambientet e Kuvendit, u theksua rëndësia e intensifikimit të bashkëpunimit ndërinstitucional mes Kuvendit dhe Parlamentit Europian, si një faktor kyç për përshpejtimin e procesit të integrimit europian të vendit.

Peleshi nënvizoi se rritja e bashkëpunimit me institucionet e Bashkimit Europian dhe përfshirja në programet mbështetëse të BE-së po kontribuojnë drejtpërdrejt në forcimin e rolit të Kuvendit dhe rritjen e standardeve demokratike.

Në këtë kuadër, u prezantua edhe nisja e projektit trevjeçar “EU for Democracy”, i financuar nga Bashkimi Europian dhe i zbatuar nga IDEA +7.

Ky projekt synon të rrisë kapacitetet e administratës së Kuvendit, duke fuqizuar mekanizmat e kontrollit parlamentar dhe duke modernizuar shërbimet parlamentare në përputhje me standardet europiane.

Bashkëbiseduesit vlerësuan se iniciativa të tilla përbëjnë një hap konkret drejt konsolidimit të institucioneve demokratike dhe avancimit të agjendës së integrimit europian të Shqipërisë.

Burimi ATSH