Në Prefekturën e Korçës u zhvillua sot sesioni përmbyllës i Komitetit Pilotues për përgatitjen e paketës së projektit të çeljes së Liceut Franko-Shqiptar për Shkencën dhe Inovacionin.

Në këtë sesion ishin të pranishëm ambasadorja e Francës në Shqipëri, Catherine Suard dhe ministrja e Arsimit, Mirela Kumbaro.

Paketa e projektit të liceut po përgatitet përmes një bashkëpunimi mes institucioneve qendrore e vendore me ekspertin e qeverisë franceze, Jérôme Lebars, i cili prej më shumë se një viti është atashuar në institucionin e Prefekturës Korçë, për të ndjekur nga afër këtë projekt.

Përmes një postimi në rrjetet sociale, Jole informoi se Prefektura ka mbështetur nga afër punën e ekspertit francez dhe ka koordinuar bashkëpunimin mes institucioneve qendrore e vendore për të garantuar ecurinë e suksesshme të këtij projekti.

“Ky projekt shumë i veçantë është vazhdim i traditës së miqësisë së thellë mes dy vendeve tona. Ngritja e këtij institucioni të rëndësishëm të arsimit, do hapë një perspektivë të re për shumë të rinj të qarkut tonë e më gjerë, të cilët do të kenë mundësinë të ndjekin një shkollë elitare me standarde evropiane për arsimin e tyre të mesëm”, tha Jole.

Projekti për hapjen e Liceut Franko-Shqiptar për Shkencën dhe Inovacionin është vazhdë e traditës së miqësisë më të mirë mes Shqipërisë e Francës.

Burimi ATSH