Ministri i Drejtësisë, Besfort Lamallari deklaroi sot në seancën plenare në Kuvend se opozita ka mbjellë gjuhën e urrejtjes ndaj gjyqtarëve dhe prokurorëve.

Duke iu referuar vrasjes së gjyqtarit Astrit Kalaja në Gjykatën e Apelit, Lamallari tha se bësh politikë me vrasjen dhe me një rast tragjik, të bësh retorikë të mundohesh të kapitalizosh politikisht mbi vrasje, është e rëndë.

“Keni përgjegjësi për gjithë gjuhën denigruese që keni përdorur ndaj gjyqtarëve ndaj prokurorëve. Nga daljet në ballkon që keni folur e keni sharë e telendisur, SPAKU, e SKRAP-i etj. Me gjuhën që keni përdorur ndaj prokurorëve dhe gjyqtarëve nga Altin Dumani, Altin Troplini, Dum Dum Zamani e gjithë këto që keni përdorur janë të gjitha akuzat dhe gjuha e urrejtjes që keni ngjallur ndaj gjyqësorit dhe sigurisht që normalisht do ndodhin ngjarje të tilla”, tha Lamallari duke iu drejtuar deputetëve të opozitës.

“Unë flas këtu si përfaqësues i mbrojtjes, i institucioneve të drejtësisë. Ju keni qenë këtu gjithë kohës dhe nuk keni lënë person, duke nisur nga prokurorja e përgjithshme që e keni ofenduar në sytë e publikut, në sytë e ndërkombëtarëve. Keni anatemuar partnerët strategjikë, ambasadorin e SHBA-ve, ambasadoren e Bashkimitt Europian, vetëm e vetëm se mbështetën reformën në drejtësi. Dhe reforma në drejtësi po sjell këto rezultate. Dhe të hënave kur shkoni atje ndillni gjuhën e urrejtjes. Ju keni gojë të flisni dhe thotë zonja që nuk janë bërë atentate mafioze këtu. Çfarë është kjo. Nuk keni turp. Shqiptarët e dinë, prandaj ju kanë votuar dhe ju kanë lënë aty ku ju kanë lënë”, u shpreh Lamallari, duke iu referuar deklaratave të kryetarit të PD-së, Sali Berisha pas paraqitjeve në SPAK, të hënave.

“Mos linçoni prokurorë, mos linçoni gjyqtarë. Mos ngjallni gjuhën e urrejtjes. Urrejtja prodhon vetëm urrejtje, prodhon dhunë dhe ju këtë keni bërë gjithë këto vite. Turp t’ju vijë ju. Dhe kini kujdes kur bëni kapital politik me gjyqtarë dhe prokurorë. Lërini gjyqtarët dhe prokurorët të bëjnë punën e tyre deri sa të vijnë tek ju. Deri sa të vijnë në pasuritë që i keni vjedhur këtij populli”, theksoi Lamallari.