E Ngarkuara me Punë Nancy VanHorn zhvilloi një bisedë me ministren për Europën dhe Punët e Jashtme, Elisa Spiropali, në rolin e saj të ri, pas javës së nivelit të lartë të Asamblesë së 80-të të Përgjithshme të OKB-së, njoftoi sot ambasada e Shteteve të Bashkuara në Tiranë.

Në takim u bisedua mbi përgatitjen e të dy vendeve aleate të NATO-s për të përballuar sfidat e reja të kohës sonë.

Në këtë kuadër, u diskutua mbi shpenzimet e qëndrueshme në fushën e mbrojtjes për sigurinë afatgjatë, bashkëpunim të ngushtë për të luftuar organizatat kriminale ndërkombëtare dhe kushte të drejta ekonomike që u mundësojnë bizneseve të lulëzojnë.

Ambasada e Shteteve të Bashkuara në Tiranë bëri të ditur sot se, “aleatët e përkushtuar të NATO-s sigurohen që të jenë të përgatitur për të përballuar sfidat e reja të kohës sonë – përfshirë shpenzimet e qëndrueshme në fushën e mbrojtjes për sigurinë afatgjatë, bashkëpunim të ngushtë për të luftuar organizatat kriminale ndërkombëtare dhe kushte të drejta ekonomike që u mundësojnë bizneseve të lulëzojnë”.

Edhe ministrja për Evropën dhe Punët e Jashtme, Elisa Spiropali njoftoi se takoi gjatë ditës së sotme përfaqësues, siç u shpreh ajo, të vendeve mike e aleate që mbështesin si partnerë strategjikë vazhdimin e punëve të mira drejt Shqipërisë 2030.

Përveç takimit me VanHorn, Spiropali pati takime edhe me ambasadorin italian Marco Alberti dhe me Ambasadorin britanik Nick Abbott.

Burimi ATSH