Pronarët e automjeteve të braktisura duhet t’i largojnë ato brenda 30 ditëve, përndryshe policia bashkiake e Tiranës do të ndërhyjë për heqjen e tyre.

Njoftimi i policisë bashkiake të kryeqytetit vjen në kuadër të punës për lirimin e hapësirave publike, një prioritet i shpallur nga kryeministri Edi Rama.

Policia bashkiake e Tiranës njoftoi sot pronarët e mjeteve se, nëse nuk i largojnë ato brenda afatit të përcaktuar, automjetet do të transportohen në vendin e përcaktuar për depozitimin e mjeteve të braktisura.

“Lirojmë hapësirat publike, përmirësojmë qarkullimin dhe krijojmë një qytet më të rregullt,” thekson policia bashkiake, duke kërkuar bashkëpunimin e qytetarëve.

Në këtë kuadër, policia bashkiake fton qytetarët të raportojnë çdo mjet të braktisur në lagjet e tyre, duke dërguar foto dhe lokacion në numrin e telefonit 0689500030.

E konsideruar si një nismë e domosdoshme për rritjen e cilësisë së shërbimeve ndaj komunitetit, lirimi i hapësirave publike synon gjithashtu të rikthejë funksionalitetin e bizneseve dhe sipërmarrjeve, por edhe individëve në hapësirat publike në përputhje me standardet kombëtare të mikpritjes dhe shërbimit.

Kryeministri Rama ka paralajmëruar se po hartohet Rregullorja Kombëtare, e cila do të përcaktojë me ligj hapësirat që mund të shfrytëzojnë bizneset. Sipas tij, “për çdo karrige të vendosur në hapësirën e kufizuar, subjekti duhet të kontribuojë me një pemë në Fondin e Gjelbër, që do të krijojë qeveria e re”.

Po ashtu, Rama ka bërë të ditur se do të ashpërsohen dënimet penale dhe administrative për shkeljet që lidhen me hapësirat publike.

Procesi i lirimit të hapësirave publike nisi në fillim të korrikut, ndërsa Kryeministri ka deklaruar se “ofensiva” do të mbetet në fokus të pushtetit vendor dhe qendror në kuadër të programit “Rilindja Urbane 2.0”.

Në shërbim të qytetarëve është vënë edhe portali “Hapësiraime.gov.al”, ku deri më sot janë raportuar 10 351 raste, prej të cilave 7 137 janë zgjidhur, ndërsa 3 214 janë në proces.