Ambasadori i Gjermanisë në Tiranë, Karl Bergner, drejtoresha e Zyrës së Këshillit të Evropës në Tiranë, ambasadorja Giulia Re, si dhe drejtori i Akademisë për Studime Politike, Erjon Tase, ndoqën dje nga afër ushtrimin e votimit të maturantëve të shkollës së mesme “Qemal Stafa” në Tiranë, në kuadër të programit të edukimit të votuesve të rinj, njoftoi sot Ambasada gjermane në Tiranë.

Në kuadër të programit “Edukimi i votuesve për herë të parë në Shqipëri 2025 – Unë votoj gjithashtu!”, nxënësit që do të votojnë për herë të parë në zgjedhjet e 11 majit, realizuan një simulim të plotë të procesit zgjedhor – përfshirë kandidatë, komision zgjedhor, vëzhgues dhe media.

Qëllimi është të forcohet kuptimi për proceset demokratike dhe të rritet ndërgjegjësimi për rëndësinë e votës së tyre.

Gjermania mbështet financiarisht këtë program arsimor në kuadër të projektit të Këshillit të Europës “Fuqizimi i Integritetit të Zgjedhjeve në Shqipëri (SEI)”, në bashkëpunim me Komisionin Qendror të Zgjedhjeve (KQZ), Agjencinë Kombëtare për Arsimin Parauniversitar (AKAP) dhe Akademinë për Studime Politike (ASP).

“Në zgjedhjet e 11 majit, rreth 114 mijë të rinj do të fitojnë të drejtën të votojnë për herë të parë. Është një sinjal i fortë për të ardhmen e Shqipërisë që ata të përfshihen që herët në proceset demokratike”, bëri të ditur Ambasada.

Duke falënderuar të gjithë pjesëmarrësit për përkushtimin e tyre, veçanërisht nxënësit për entuziazmin dhe seriozitetin e treguar, Ambasada thekson se, “demokracia jeton përmes pjesëmarrjes dhe pikërisht këtë pamë dje”.

Burimi ATSH