Nga Marash Mirashi

STATUJAT E QYTETIT ME SHI

Në këtë qytet, shiu i imtë
njësoj i lag statujat, si njerëzit
por ato nuk i ngrenë sytë nga qielli
e nuk ëndërrojnë kurrë
ndërrimin e motit.

I çudit statujat sjellja njerëzore
me çadra mbi kokë, zhurmat e makinave…

Mbi buzët e bronxëta
u shaqet befas
Një qeshje e lehtë ironike

Një tingull kambane nga kisha tej Lanës
vjen tek busti i Papa Vojtilës…
Një shi i çuditshëm
mbi supe bronxi
vazhdon të bjerë mërzitshëm.

Njerëzit kanë nisur t’u ngjajnë statujave
që nuk e endërrojnë ndryshimin e motit
të mbytur në kafene,
thashetheme, kotësi
në këtë qytet
me jetë monotone
nën shi…

***

– nga libri “Britmat e muzgut modern”, 2021