Çdo qytetar që aplikon për letërnjoftim në bashkinë e Himarës, ku ka zgjedhje të pjesshme në datën 4 gusht, para datës 1 gusht do të mund të tërheqë letërnjoftimin e ri deri në 3 gusht, pra nuk do të presin 2 javë.

Ministri i Brendshëm Taulant Balla ishte në zyrat e “Identitek” ku u njoh nga afër me masat e marra për lehtësimin e procesit për të gjithë shtetasit pasi tashmë shërbimet ofrohen edhe ditëve të shtuna, ndërsa për rastet e përshpejtuara, aplikimi mund të bëhet në të gjithë vendin, pavarësisht vendbanimit.

Këto ndryshime kanë për qëllim t’ua lehtësojnë procedurën shtetasve që punojnë e jetojnë jashtë vendit dhe janë kthyer në atdhe për pushime.

Ministri Balla vlerësoi angazhimin e kompanisë IdentiTek dhe stafit në këto ditë të nxehta vere, pasi ky ritëm pune do të vijojë edhe përgjatë 3 javëve të para të muajit gusht.

Për bashkëatdhetarët që kthehen për pushime, IdentiTek do të shërbejë edhe të shtunave për tre javët e para të gushtit. Aplikimi me kupon të përshpejtuar ku është rivonim dokumenti mund të bëhet në çdo zyrë në të gjithë vendin. Pra nëse gjendjen civile p.sh. e ke në Shkodër, por ndërkohë po kalon pushimet në Vlorë, mund ta bësh pasaportën direkt aty ku ndodhesh. Kjo nuk vlen vetëm për shtetasit që pajisen për herë të parë me dokument. (ATSH)