Ministri për Evropën dhe Punët e Jashtme, Igli Hasani, ka mbërritur në Strasburg, ku do të marrë pjesë në sesionin e 133-të të Komitetit të Ministrave të Këshillit të Evropës.

Sipas njoftimit të MEPJ, “krahas takimeve me homologë të vendeve pjesëmarrëse, Ministri Hasani do të presë në takim shtetasit shqiptarë që punojnë në strukturat e Këshillit të Evropës.”

“Takimi i Ministrave të Jashtëm të KiE-së është i pari pas Samitit të Katërt të KiE në Rejkjavik në 16-17 maj 2023. Si i tillë, ai do të trajtojë çfarë pune është bërë gjatë një viti në përmbushje të detyrave të lëna nga ky Samit dhe do të përcaktojë hapat, objektivat dhe sfidat për në vijim”, thuhet në njoftimin e MEPJ.

Tre boshtet kryesore në fokus të punës së Këshillit të Evropës gjatë 12 muajve të shkuar kanë qenë: 1) Solidaritet dhe mbështetje konkrete për Ukrainën; 2) Forcimi i qëndresës ndaj agresionit rus; 3) Adresimi i sfidave ndaj vlerave demokratike, të drejtave të njeriut dhe demokracisë në kontinentin evropian.