Nga Sadik Bejko

Dje këtë libër ia dhashë për lexim vëllait tim Manes, që është i dhënë pas leximeve me temë nga historia.

Ky libër mund të pëlqehet nga lexuesi i të gjitha niveleve kulturore, jo vetëm nga ata që janë të specializuar në leximet historike. Libri ka një stil të kapshëm dhe të këndshëm dhe për lexuesin e zakonshëm, por me një prirje nga literarura historike.

Për një arsye tjetër do ta rekomandoja pa hezitim për të gjithë miqte e moshës sime dhe jo vetëm për ata të kesaj moshe.

Pse e rekomandoj?

Ne që vijmë nga ajo kohë “e shkuar” e kemi lexuar historinë të filtruar me syzat e profesorëve tanë komuniste. Ata jo vetëm i filtronin faktet sipas ideologjisë, por edhe i gjymtonin faktet dhe analizat që të ishin në kallëpin që ata kishin në kokë.

Ne të lexuarit asaj kohe nganjëherë na ngjan se dimë gjithcka nga historia. Se dimë shumëçka për Fan Nolin.

Por nuk është e vërtetë. Lexoni këtë libër që ta kuptoni sesa pak dini…

Pse?

Kemi lexuar gjëra te manipuluara, ose të krasitura me sëpatën e ideologjisë së profesorëve tanë “të gjitheditur”.

E rekomandoj këtë libër të Ilir Ikonomit, jo vetëm te ata që nuk kanë lexuar shumë për Fan Nolin dhe epopenë e tij më 1906-1920. E rekomandoj më shumë për ata që pandehin se i kanë lexuar të gjitha faktet mbi Fan Nolin e kësaj periudhe. Një nga ata isha unë.

Lexova këtë libër dhe m’u hapën sytë për shumë gjëra. Për shume gropa të errëta, për shumë imtësi të fshehura, për shumë figura e fakte të përdredhur, për personalitete historike të kthyera në statuja të thyera a të thërrmuara…nga guzhina ideologjike e kohës.

Lexoni këtë libër me histori bio. Jua jep në dorë personazhet, ngjarjet, faktet. Autori “fshihet” distancohet që t’i shihni ju me sytë tuaj gjërat, jo me sytë e atij që ka bërë librin. Për të gjitha duhet të gjykoni ju.

Ky libër është frut i një risie konceptuale për mënyrën sesi duhet shkruar një histori. Në këtë rast, vjen historia e një Kryepersonazhi të historisë sonë Kombëtare, histori e një Fan Noli, e një apostulli në altarin kombëtar shqiptar.