Një zbulim i rrallë del në dritë në Durrës.

Ministrja e Kulturës, Elva Margariti u shpreh sot se, një mozaik i periudhës së hershme perandorake romake ka dalë në dritë gjatë punimeve për shkollën e mesme “Gjergj Kastrioti” në Durrës.

“Gjatë rindërtimit të shkollës së mesme “Gjergj Kastrioti’’, janë zbuluar gjetje arkeologjike tepër të rëndësishme si për nga tipologjia, ashtu edhe me vetë historinë e zhvillimit të qytetit antik”, u shpreh ministrja.

Ajo shtoi se, i ruajtur në një gjendje shumë të mirë, mendohet që elementet e gjetura t’i përkasin një sipërfaqeje edhe më të madhe, që tregon rëndësinë jo vetëm të zbulimit, por të gjithë zonës përreth.

“Bëhet fjalë për një bazament kolone, fragmente muresh, fragmente potenciale të pikturës murale e fragmente mermeri, që nga vlerësimi paraprak përkojnë me elemente tipike të strukturës së një vile romake”, theksoi Margariti.

Por, shtoi ministrja, “gjetja kryesore është një mozaik floreal, që nëntoka e ka ruajtur në një gjendje mjaft të mirë, i periudhës së hershme perandorake romake, që në fazën aktuale, mendohet të mbulojë një sipërfaqe prej afro 30 m2. Hulumtimi i mëtejshëm pritet të zbulojë edhe elemente të tjerë të rëndësishëm të sitit arkeologjik.”

Ministrja shtoi se, vijimi i gërmimeve pritet të dhurojë rezultate mbresëlënëse.

“Pas këtij zbulimi do të realizohet gërmimi arkeologjik i hapur me qëllim evidentimin e plotë të këtij siti, në vijim të së cilit do të vlerësohet ecuria e mëtejshme e projektit dhe destinacionin final të materialeve arkeologjike”, u shpreh Margariti.

Ky mozaik, i përbërë nga gurë ngjyrë blu të errët dhe të bardhë ku paraqiten figura gjeometrike dhe floreale, i përket fundit të shekullit I dhe fillimit të shekullit II dhe është pjesë e një vile luksoze që ndodhej pranë amfiteatrit të Durrësit.

Deri tani janë zbuluar disa pjesë të këtij mozaiku që mendohet të ketë një sipërfaqe rreth 60 metra katrorë. Përveç mozaikut është zbuluar edhe një pjesë muri 3 metra të lartë në anën lindore, si dhe disa objekte të tjera. Punimet në këtë mozaik janë kryer me një nivel mjaft të lartë profesional.

Ky është një zbulim mjaft i rrallë arkeologjik që i shtohet trashëgimisë së jashtëzakonshme kulturore të Durrësit. Puna e arkeologëve do të vijojë deri në zbulimin e plotë të të gjithë objekteve arkeologjike në këtë zonë.