Në mjediset e TKOB-së u mbajt konferenca për shtyp për masterclass-in me sopranon e njohur Ermonela Jaho. Pjesë e panelit përveç sopranos Jaho, ishte edhe ministrja e Kulturës, Elva Margariti, drejtoresha e përgjithshme e TKOB-së, Abigeila Voshtina si dhe drejtori artistik Jacopo Sipari di Pesscaseroli.

“Jemi me fat që një yll ndërkombëtar si Ermonela Jaho vjen në Shqipëri për një “detyrim shpirtëror”, siç e quan ajo, për të ndarë përvojën e saj me brezat e rinj”, është shprehur ministrja Margariti.

Ermonela Jaho rikthehet në Teatrin Kombëtar të Operës dhe Baletit për të vijuar me masterclass-e me të rinj nga Shqipëria, por edhe vende të tjera të Europës, që janë regjistruar si pjesëmarrës.

Këtë sezon janë marrë 22 aplikime për pjesëmarrje efektive dhe 17 pjesëmarrës dëgjues.

Ministrja Margariti e ka konsideruar masterclass-in me Jahon si një shkollë të gjallë jo vetëm profesionale, por edhe jete; me një modesti të rrallë, që nga njëri sukses në tjetrin, nga një udhëtim në tjetrin ka vullnetin për të dhënë kontributin e saj në vendin e lindjes, duke shpërndarë energji pozitive dhe mesazhe shprese.

Pjesëmarrësit në këtë masterclass do të jenë nga Shqipëria, Franca, Serbia, Kosova, Italia e Mali i Zi, kryesisht të rinj të moshës nga 22-30 vjeç.

Pjesëmarrësit do të mësojnë mbi teknikën fizike të këndimit, asaj të interpretimit e këndimit, përgatitjes psikologjke të repertorit dhe ndërtimit të një roli.

Masterclass-i ofrohet krejtësisht pa pagesë dhe pjesëmarrësit do të pajisen me një certifikatë pjesëmarrjeje.

Përgjatë datave 30 shtator deri më 2 tetor, pjesëmarrësit efektiv janë trajnuar nga maestro Davide Dellisanti, i ardhur nga Italia për të përgatitur këta kandidatë fitues me një masterclass, dhe për të punuar me Ermonela Jahon. Dellisanti ka punuar për rreth 6 orë në ditë për të përgatitur pjesëmarrësit.