Fshati Labovë e Kryqit ka një potencial të pamohueshëm ekonomik të bazuar në turizëm.

Kisha e saj madhështore dhe shumëllojshmëria e aktiviteteve në natyrë dhe atraksioneve turistike të vendosura në malet e afërta, e bëjnë atë një destinacion tërheqës për të cilin Shqipëria aplikoi në programin e “Best Tourism Viilages” nga UNWTO.

Projekti “Për Zhvillimin e Qëndrueshëm Rural”, i GIZ Albania bën të ditur se, “mbështetja e qeverisë që i është dhënë fshatit si pjesë e programit IPARD ka mundësuar nxitjen e zhvillimit të infrastrukturës dhe rritjen e potencialit turistik, duke kontribuar me rritjen e popullaritetit të tij”.

Labova e Kryqit numëron aktualisht dy objekte akomodimi, duke përfshirë agroturizmin e njohur Bujtina Maria që ofron një shumëllojshmëri shijesh lokale të veçanta.

Numri i turistëve është rritur vazhdimisht në vitet e fundit dhe fermerët vëndas kanë qenë në gjendje të furnizojnë me prodhimin e tyre bizneset e zonës, duke krijuar një partneritet të frytshëm.

Duke shfrytëzuar ndjenjën e tij legjendare të mikpritjes, si dhe trashëgiminë kulturore dhe natyrore, ky fshat do t’u ofrojë turistëve një përvojë të paharrueshme të jugut të Shqipërisë.

103 investime janë mbështetur nga programi IPARD II në kuadër të masës për diversifikimin e fermave dhe gjallërimin e ekonomisë në zonat rurale.

Agjencia për Zhvillim Bujqësor dhe Rural, (AZHBR) bën të ditur se, këto investime përfshijnë sipërmarrjet agroturistike, bujtinat, prodhimin dhe përpunimin e bimëve medicinale, industrinë e artizanatit, prodhimin e energjisë së rinovueshme, akuakulturën, etj.

Qëllimi është ndërtimi i modeleve të suksesit, rritja e standardeve të jetesës, hapja e vendeve të reja të punës dhe shtimi i të ardhurave të familjes rurale.

Mbështetja për këto investime ka arritur në vlerën prej 17.04 milion euro, të cilat janë fonde të Bashkimit Evropian, në bashkëfinancim me qeverinë shqiptare.

Synimi i programit IPARD, nga fondet e Bashkimit Evropian në bashkëpunim me qeverinë shqiptare, është zhvillimi i bujqësisë përmes modernizimit dhe automatizimit të veprimtarisë së fermave dhe eksporteve, duke ndikuar pozitivisht në ekonominë e fermerëve dhe sipërmarrësve, në punësimin e të rinjve dhe zhvillimin e bizneseve në zonat rurale. /ATSH