Kryetari i Komisionit për Sigurinë Kombëtare, Nasip Naço përfaqësoi Kuvendin në takimin e Nivelit të Lartë të kryetarëve të parlamenteve të vendeve të NATO-s që u zhvillua në Vilnius të Lituanisë nga data 1-3 qershor 2023.

Lituania është vendi që pret në korrik samitin e NATO-s që këtë vit merr rëndësi të veçantë për shkak të situatës globale të mbrojtjes dhe sigurisë.

Ky takim i këtij niveli organizuar nga Viktorija Cmilyte-Nielsen, kryetare e Seimas solli edhe një herë në vëmendje rolin e pazëvendësueshëm të diplomacisë parlamentare por edhe funksionin e saj kontrollues ndaj qeverisë.

Diskutimet u fokusuan në rolin global të NATO-s përballë sfidave të kohës, si dhe transformimin e brendshëm të Aleancës, shpenzimet dhe buxhetet e mbrojtjes me synim rritjen e kapaciteteve të mbrojtjes.

Një panel i veçantë diskutoi mbi Ukrainën, duke përqendruar temën tek e ardhmja e këtij vendi. Në takim ishte prezent edhe kryetari i Verkhovna Rada, Ruslan Stefanchuk i cili tha se mbështetja për NATO-n në Ukrainë është në nivelin 82% dhe anëtarësimi i tyre në Aleancë do të sillte përfitime të dyfishta.

Pjesëmarrësit ndoqën një demostrim në terren të eFP NATO që ndodhet i dislokuar në Lituani.

Në takim merrnin pjesë 29 delegacione parlamentare.

Gjatë ditëve të aktivitetit, Naço pati shkëmbime me homologët e tij të rajonit si dhe një takim miqësor me kryetarin e Kuvendit të Maqedonisë së Veriut, Talat Xhaferi.