Zëvendëskryetarja e Kuvendit, Ermonela Felaj Valikaj, përshëndeti sot në Konferencën e Pestë Kombëtare: “E drejta për Informim, Hapje, Transparencë, Digjitalizim”, organizuar nga Komisioneri për të Drejtën e Informimit dhe Mbrojtjen e të Dhënave Personale.

Felaj vlerësoi se Komisioneri, edhe pse institucion ende i ri, me një histori të shkurtër 15-vjeçare, ka krijuar tashmë një bilanc të pasur dhe po kontribuon për të kultivuar një kulturë të re për transparencën e autoriteteve publike.

“Me punë, kontribut, performancë profesionale e dinjitet, institucioni ka zënë vendin e tij të rëndësishëm në kontekstin e institucioneve të pavarura, si gardianë të interesit publik dhe mbrojtjes së të drejtave të qytetarëve. Në kushtet e sotme, kur rreziku nga kërcënimet kibernetike, të cilat marrin shpesh dhe haptazi format e terrorit kibernetik, mbrojtja e të dhënave të qytetarëve merr një rëndësi të veçantë”, u shpreh Felaj.

Këtej, sipas saj, buron edhe rëndësia, mbështetja dhe prioriteti që Kuvendi dhe Qeveria po dëshmojnë dhe do të vijojnë të dëshmojnë për Komisionerin për të Drejtën e Informimit dhe Mbrojtjen e të Dhënave Personale.

“Përdorimi i gjerë i shërbimeve publike digjitale, për të cilin Shqipëria dallohet në kontekstin rajonal, por edhe më gjerë, është një tjetër premisë që duhet të na bëjë të kemi më shumë vëmendje e të mobilizojmë më shumë burime për këtë institucion”, vijoi ajo.

“Të gjithë institucionet e shtetit duhet të ndërgjegjësohemi për të zbatuar me korrektesë rekomandimet e Komisionerit për rritjen e sigurisë në mbrojtjen e të dhënave”, theksoi Felaj.