Nga Dash Frashëri,
moderator grupit “Përmetarë në Vite”

Të shkruaj portretin e Inxhinier Sabri Shabanit – në përvjetorin e ditëlindjes së tij – është gjëja më e lehtë për mua.

Për shumë arsye! Personale. Familjare. Sportive.

PERSONALE

Kur Sabri Shabani përfundoi Institutin e Pyjeve në Shkodër dhe u emërua në Ndërmarjen Pyjore në Përmet, Komiteti Ekzekutiv i asaj kohe e strehoi inxhinierin e ri tek ish-spitali i qytetit, te një kompleks banimi dykatësh (sot i rënuar, plotësisht), dhe që atë kohë njihej me zhargonin: “Godina e Beqarëve”.

Vetëm një mur e ndante shtëpinë time në Përmet më shtëpinë e Ing. Shabanit. Përshëndeteshim shpesh. Zëri i qetë i Sabriut ka ndikuar jo pak në të folurën time, gjithmonë me ton të ulët, si një valë e butë Vjose.

Punësimi im i parë historik lidhet pikërisht me Ing.Sabriun.

Gjatë pushimeve verore, kur isha në gjimnaz, asokohe, vetëm 16 vjeç, duke qenë komshinj, dhe njeri shumë pozitiv, ai më mundësoi të punoja në sektorin e shkoqjes së borzilokut për eksport. Një punë “aromatike”.

Paratë e para të fituara gjithmonë mbahen mend. Dhe kjo falë Inxhinier Sabriut.

FAMILJARE

“Dajo”. Kështu e quaj ing.Sabriun kur bisedojmë në telefon.

Dhe këtë “Dajo”, nuk ia them për kortezi, dhe as për mirësjellje për shkak se është më i madh në moshë.

Jo. Ai është dajua i bashkëshortes sime, Almës.

Është vëllai i vetëm i vjehrrës sime, Përparimes. Vëllai edhe i Shpresës, Rukisë, Sofisë dhe Yllkës (renditja sipas moshës).

“Bikja” është mburja e familjes Shabani. Dhe me të drejtë. Jeta e tij. Formimi i tij. Edukata e tij. Familja e tij. E bëjnë atë të “përkëdhelurin”.

Si njeri i familjes së tyre, i kam parë motrat e tij, por dhe mbesat të lumturohen kur flasin me Sabriun. Edhe të përloten shpesh nga malli.

Sabriu jeton në Bolonja, në Itali. Me një bashkëshorte të shkëlqyer si Dhespina, apo “Leboja”, dhe dy djem me të mirë – ndoshta edhe më të zotë se Sabriu (kjo edhe falë formimit dhe shkolla që kanë ndjekur në Itali).

SPORTIVE

Sabriu i përket një brezi të artë të futbollistëve përmetarë. Të cilët e çuan “24 Majin”, në majën më të lartë të prezantimit në arenën kombëtare – në Kategorinë e Parë (sot, Kategoria Superiore).

Energjik. I palodhur. Impulsiv. I saktë.

Një Sabri ndryshe nga inxhinieri i qetë.

Futbolli është sport motivues. Ka adrenalinë. Tifozët gjithashtu bëjnë të tyren. Sabriu është brohoritur përzëemërsisht nga tifozët e zjarrtë në stadiumin “Durim Qypi”, një nga shokët më të mirë të tij, në fushën e futbollit dhe jashtë tij.

Sporti është një pjesë e rëndësishme e jetës sime. Kam shkruar qindra artikuj gjatë 20 viteve të fundit, për gazeta sportive si “Sport Ekspres”, “Sport Plus”, apo dhe të përgjithshme si “Albania” dhe “Telegraf”. Për më tepër që kam pasur një nga portalet më të bukur për sportin Albania-sport.com (i mbyllur në 2013) dhe tashmë botoj portalin Tifozet.al (aktiv online).

URIMI PËR DITËLINDJE

Në emër edhe të familjes sime, bashkëshortes sime, si dhe dy vajzave të mia, Dea dhe Laura, por edhe në emër të motrave të tij, i urojmë Sabriut, sa më shumë vite të lumtura. U bëfsh shekullor DAJO!

Do ta ngrejmë një dolli me raki Përmeti. Më e mira në botë!