Ministrja për Europën dhe Punët e Jashtme, Elisa Spiropali, gjatë vizitës në Danimarkë ishte e ftuar edhe në Universitetin e Kopenhagenit.

Në bashkëbisedimin me studentët e këtij universiteti, Spiropali theksoi se, ku “rrugëtimi ynë europian nuk është arratisje nga vendi, por ndërtimi i një Shqipërie të drejtë, të zhvilluar, të hapur, konkurruese, moderne, me mundësi për njerëzit e saj, si potencial vlerash dhe kontributesh edhe për BE”.

Spiropali po zhvillon një vizitë zyrtare në Mbretërinë e Danimarkës me synim avancimin e agjendës së integrimit europian të Shqipërisë dhe thellimin e marrëdhënieve dypalëshe ndërmjet dy vendeve.

Gjatë kësaj vizite ajo u takua me ministren për Europën, Marie Bjerre, mbi objektivat për avancimin e mëtejshëm të agjendës së integrimit të Shqipërisë në BE.

Në vijim, Spiropali takoi edhe ministrin e Jashtëm dhe ish-kryeministrin e Danimarkës, Lars Løkke Rasmussen.

Fokusi i takimit mes dy homologëve ishte thellimi i bashkëpunimit dypalësh, veçanërisht në kontekstin e Presidencës daneze të BE.

Burimi ATSH