Komisioni Qendror i Zgjedhjeve në bashkëpunim me Zyrën e Këshillit të Evropës në Tiranë dhe me mbështetjen financiare të Republikës Federale Gjermane, zhvilloi sot tryezën e rrumbullakët për të vënë në përdorim portalin e ri digjital për denoncime dhe ankesa zgjedhore.

Sipas KQZ-së, ky portal shënon një hap thelbësor drejt rritjes së përfshirjes qytetare dhe forcimit të integritetit të procesit zgjedhor në vend.

Portali u prezantua për përfaqësues të subjekteve zgjedhore dhe shoqërisë civile dhe ofron një hapësirë të posaçme ku çdo person mund të paraqesë denoncime apo ankesa në mënyrë të sigurt dhe të mbrojtur, duke ruajtur konfidencialitetin. Po ashtu, portali ofron akses të barabartë, pasi është dizenjuar për të garantuar akses të barabartë dhe qartësi në përdorim, duke eliminuar procedurat e komplikuara me letër si dhe siguron një sistem të centralizuar dhe të monitorueshëm për trajtimin me prioritet të rasteve.

Përmes këtij portali, qytetarët dhe subjektet mund të njoftojnë mbi një gamë të gjerë ngjarjesh që ndikojnë në rregullsinë e zgjedhjeve, si: financimi i parregullt i subjekteve/partive politike; veprimtari të komisionerëve apo subjekteve zgjedhore; problematika gjatë dhe pas ditës së votimeve; korrupsion pasiv/aktiv dhe çdo veprim tjetër që dëmton integritetin e procesit zgjedhor.

Pjesëmarrësit theksuan domosdoshmërinë e kësaj platforme, pasi ajo përmirëson transparencën dhe llogaridhënien, lehtëson gjurmimin, lejon subjektet dhe qytetarët të gjurmojnë lehtësisht hapat proceduriale që ndjek KQZ në shqyrtimin e ankesës, krijon regjistër zyrtar, ndihmon KQZ-në të krijojë një regjistër zyrtar dhe të besueshëm të të gjitha rasteve të denoncuara.

KQZ fton të gjithë qytetarët dhe subjektet zgjedhore të përdorin këtë mjet të ri për të kontribuar në një proces zgjedhor më transparent dhe të ndershëm.

Ky portal u mundësua nga projekti i Këshillit të Evropës “Fuqizimi i Integritetit të Zgjedhjeve në Shqipëri”, me mbështetjen financiare të Republikës Federale Gjermane. Përmbajtja e saj është përgjegjësi vetëm e KQZ-së.

Burimi ATSH