Për herë të parë në vendin tonë, në Durrës u zhvillua gara e parë e sportit ujor të Kitesurf-it.

Mbi 30 ushtrues të këtij sporti u mblodhën në bregdetin e “Sektorit Rinia”, duke përfituar nga moti me erë të fortë dhe realizuan garën e parë.

Kryetarja e bashkisë Durrës, Emiriana Sako tha se bregdeti i Durrësit është tërheqës edhe për eventet sportive ujore.

“Plazhi i Sektorit Rinia priti Kampionatin e Parë Kombëtar të Kitesurf-it, një aktivitet spektakolar që mblodhi mbi 30 sportistë nga Shqipëria dhe rajoni. Muzika ritmike, parashutat shumëngjyrëshe dhe energjia e garuesve krijuan një atmosferë të veçantë për publikun. Kjo garë synon të kthehet në një traditë vjetore, duke e promovuar qytetin tonë edhe si një destinacion të preferuar për sportet ujore”, tha Sako në një postim në rrjetet sociale.

Kitsurfi është një sport që konsiston në një platformë ku mbështeten këmbët e sportistit dhe me një litar që fiksohet në belin e tij lidhet një balonë e cila e tërheq atë. Ky sport kërkon një shpejtësi ere afërsisht 20 km/orë.

Burimi ATSH