Kryetari i Partisë së Lirisë, Ilir Meta u shpreh sot se “në 14 maj nga korrupsion absolut do të ketë transparencë absolute”.

I ftuar në një studio televizive, Meta tha se kjo është marrëveshja e tij me Berishën.

“Nuk do të ketë mbledhje këshilli të mbyllura. Në këshill nuk do të flasin vetëm këshilltarët, por do të ketë seanca të posaçme që të flasin qytetarët”, tha ai.

Meta theksoi se “pas 14 majit do të shikohen të gjitha investimet që janë bërë”.

“U shqetësua për gishtin e Belos, por e patë Mariglen Qaton kishte marrë 25 milionë nëpërmjet familjarëve të tij, duke punuar në bashki”, tha ai.

Meta siguroi se modeli i korrupsionit do të zëvendësohet me modelin e transparencës absolute.

“Kush e pengoi të mos e falimentonte Kavajën? Kush e pengoi të mos falimentonte Vorën? Vora një nga bashkitë më të pasura. Atij i ka falimentuar modeli që ka ofruar, modeli i korrupsionit që do të zëvendësohet me modelin e transparencës absolute”, tha ai.

Meta theksoi se “në 14 maj kandidon Belind Këlliçi, ndërsa për Ilir Metën do të votohet shumë shpejt në zgjedhje të parakohshme”.

“Ky mendon që demokratët do të mërziten për emrin tim. Nuk e di ky, kush e mbushi sheshin në 2 mars. Në 2 mars demokratët e mbushën sheshin. Në 14 maj nuk kandidojmë ne. Kandidon Belind Këlliçi dhe kandidati që ky nuk e nxjerr nëpër postera. Kandidon Belind Këlliçi dhe autobusi falas. Për Ilir Metën do të votohet shumë shpejt në zgjedhje të parakohshme”, tha ai.

“Ftojeni Belind Këlliçi në studio dhe kandidatin tjetër që të ballafaqohen në studio. Nëse i intereson përballja me Ilir Metën ma sill këtu Edi Ramën të përballet me Ilir Metën. Le të përballet me mua”, shtoi ai. /ATSH