Presidentja e Kosovës, Vjosa Osmani, ka pasur shumë takime e krerë shtetesh dhe përfaqësues të rëndësishëm politikë në ditën e parë të qëndrimit në Shtetet e Bashkuara, në margjinat e Asamblesë së Përgjithshme të OKB-së, së bashku me ministren e Jashtme Donika Gërvalla.

“Me presidentin e Lituanisë, z. Gitanas Nausėda, diskutuam për raportet e mira ndërmjet vendeve tona, si dhe për sfidat me të cilat përballen dy vendet tona, në mënyrë të vecantë, për sfidat e sigurisë, të cilat e kërcënojnë paqen dhe stabilitetin në rajonin e Ballkanit dhe atë të Baltikut. Morëm përkrahjen e plotë për përpjekjet e Kosovës për fuqizim të shtetësisë sonë.

Pastaj takova presidentin e Kosta Rikës, Carlos Alvarado Quesada, me të cilin biseduam për mundësitë e bashkëpunimit ndërshtetëror. Kosta Rika është ndër shtetet e para që ka njohur Kosovën, duke treguar lidership në mbarë botën për njohjen e së drejtës së popullit të Kosovës për pavarësi e vetëvendosje. Diskutuam se si ta thellojmë edhe më tej partneritetin tonë dhe si ta zgjerojme rrethin e shteteve që e njohin republikën tonë.
Po të njëjtën ditë, takova edhe sekretarin e Përgjithshëm të Organizatës së Konferencës Islamike, Yousef bin Ahmad Al-Othaimeen, me të cilin diskutuam për thellimin e bashkëpunimit politik dhe ekonomik me shtetet anetare të kësaj organizate, si dhe nevojën që Kosova të njihet edhe nga shtetet anëtare të kësaj organizate të cilat nuk e kanë njohur ende Kosovën. Rasti i Kosovës është unik për nga aspekti historik, politik e juridik, prandaj duhet të njihet sakrifica e gjatë e popullit të Kosovës për liri, e cila u kurorëzua me shpalljen e pavarësisë, akt ky që u konfirmua edhe nga GJND-ja.

Poashtu bashkëbiseduam me ministrin e Jashtëm të Omanit, Sayyid Badr bin Hamad bin Hamood Albusaidi, për përkrahjen që ky vend po u jep përpjekjeve të Kosovës për forcim të shtetësisë, si dhe për votën që ky vend i ka dhënë Kosovës për anëtarësim në organizatat ndërkombëtare, siç është UNESCO, FMN, Banka Botërore etj. Morëm konfirmimin se Omani do t’i përkrahë të gjitha përpjekjet e Kosovës për anëtarësim në organizata ndërkombëtare.
Në pritjen e organizuar nga Presidenti Erdogan me rastin e inaugurimit të misionit të ri të përhershëm të Turqisë në Kombe të Bashkuara, patëm poashtu mundësinë të bisedojmë me përfaqësues të shumë shteteve të tjera.

Në ditën e parë gjithashtu takova mikun e madh të shqiptarëve, ish-kongresistin Eliot Engel, të cilin e falënderova për rolin e tij të jashtëzakonshëm në njohjen ndërkombëtare të së drejtës së popullit të Kosovës për pavarësi”, shkruan Osmani në Facebook.