Balkans Sea Fair rikthehet në Marina Orikum, për edicionin e dytë, pas debutimit në maj të vitit 2025.

Marina Orikum në Vlorë do të mirëpresë së shpejti këtë aktivitet që synon të promovojë turizmin detar në Shqipëri, duke bashkuar për tri ditë lundrimin, aventurën, biznesin dhe argëtimin pranë detit.

Ministri i Turizmit, Kulturës dhe Sportit, Blendi Gonxhja, bëri të ditur se ky aktivitet do të shërbejë si një mundësi për të prezantuar potencialin e turizmit detar shqiptar, për të nxitur bashkëpunime të reja dhe për të promovuar bregdetin edhe gjatë sezonit të vjeshtës.

Pjesë e aktivitetit do të jenë jahte luksoze, barka me vela, mjete lundrimi dhe peshkimi, si dhe aktivitete të ndryshme të sporteve ujore, duke sjellë së bashku sipërmarrës, profesionistë të sektorit dhe të apasionuar pas detit.

Përgjatë tri ditëve, nga data 16 deri më 18 tetor, Balkans Sea Fair do të synojë të krijojë mundësi për shkëmbime dhe bashkëpunime në fushën e turizmit detar, si dhe të vërë në pah mundësitë që ofron bregdeti shqiptar përtej muajve tradicionalë të verës.

Burimi ATSH