Qeveria pritet të miratojë të mërkurën zonat e reja prioritare në kuadër të Paketës së Maleve.

Ministri i Shtetit për Pushtetin Vendor, Ervin Demo, i pranishëm në një takim të kryeministrit Edi Rama me banorët e Thethit, tha se në zonën e Shkodrës, gjatë raundit të parë, janë regjistruar 11 përfitues nga Paketa e Maleve. Sipas Demos, Thethi dhe zonat e ngjashme kanë qenë frymëzimi mbi të cilin është konceptuar Paketa e Maleve.

“Ne vijmë në vendin ku është konceptuar Paketa e Maleve dhe më vjen shumë mirë që vetëm në raundin e parë të thirrjeve ne tashmë kemi 11 përfituesit e parë. Duke vijuar më pas edhe me ata që kanë aplikuar dhe po trajtohen nga Bashkia Shkodër, shtoj se ditën e nesërme ne miratojmë në qeveri zonat e reja prioritare për bashkitë.”

Demo tha se “Thethi sot ka kaq shumë aplikantë që besojnë te historia e suksesit që po ndodh në çdo cep të Shqipërisë. Kjo histori suksesi vjen, së pari, falë mundit që vetë sipërmarrësit kanë bërë, por edhe, patjetër, falë të gjitha ndryshimeve që kanë ndodhur në zonë. Kemi ndryshime që do të ndodhin shumë shpejt edhe në Theth, duke vijuar me rrugën e Dukagjinit, e cila do ta lidhë zonën e Thethit me zonën e Tropojës, e cila do të shtojë komunikimin mes zonave dhe do të rrisë edhe më shumë fluksin e turistëve në veriun e Shqipërisë”, nënvizoi Demo.

Burimi ATSH