Pas një koordinimi institucional të ideuar dhe mbështetur nga Ambasada e Republikës së Shqipërisë në Baku në kuadër të diplomacisë kulturore, në një ceremoni të zhvilluar në prani të Ambasadorit të Republikës së Shqipërisë në Azerbajxhan, z. Besart Kadia, u nënshkrua në Baku, Memorandumi i Mirëkuptimit dhe Bashkëpunimit ndërmjet Akademisë së Shkencave të Shqipërisë dhe Akademisë Kombëtare të Shkencave të Azerbajxhanit (AMEA).

Ceremonia u zhvillua në praninë e Kryetarit té Akademisë së Shkencave të Shqipërisë, akad. Skënder Gjinushi, Presidentit të AMEA-s, akad. Isa Habibbeyli, akad. Anatas Angjelit si dhe drejtues dhe studiues të institucioneve shkencore të AMEA-s.

Kjo marrëveshje hap perspektiva të reja për projekte të përbashkëta kërkimore në fusha si historia, arkeologjia, gjuhësia, inteligjenca artificiale, zhvillimi digjital, mjedisi dhe shkencat natyrore, duke forcuar më tej urat e bashkëpunimit mes komuniteteve akademike të Shqipërisë dhe Azerbajxhanit.

Ambasada e Republikës së Shqipërisë në Baku mbetet e angazhuar për të mbështetur iniciativa që promovojnë diplomacinë shkencore, shkëmbimin e njohurive dhe afrimin e institucioneve të të dy vendeve.