Ministri i Turizmit, Kulturës dhe Sportit, Blendi Gonxhja, përcolli urimet e tij për të gjithë besimtarët myslimanë me rastin e festës së Kurban Bajramit, duke vënë theksin te vlerat e bashkëjetesës dhe harmonisë fetare në Shqipëri.

“Në këtë ditë të shenjtë të festës së Kurban Bajramit, që nderon sakrificën, përkushtimin dhe dedikimin ndaj Zotit, ku të gjithë besimtarët myslimanë festojnë, uroj nga zemra për secilin prej tyre shëndet, paqe dhe bekime në familje!”, shkroi Gonxhja në rrjete sociale.

Ministri theksoi se harmonia fetare mbetet një nga vlerat më të çmuara të shoqërisë shqiptare, duke e cilësuar atë si një dëshmi të gjallë të respektit, solidaritetit dhe bashkëjetesës mes besimeve të ndryshme.

“Mosaiku dhe harmonia jonë fetare mbeten ndër vlerat më të çmuara të shoqërisë sonë, një dëshmi e bashkëjetesës, respektit dhe solidaritetit që na bashkon. Kjo festë duhet të shërbejë si një moment reflektimi, mirëkuptimi dhe afrimi mes njerëzve”, u shpreh ministri Gonxhja.

/Marrë nga ATSH