Në zemër të Alpeve Shqiptare, Lëpusha në Malësi të Madhe po konsolidohet gjithnjë e më shumë si një nga destinacionet më të veçanta të turizmit malor në vend.

Kryeministri Edi Rama ndau sot foto nga kjo zonë turistike, duke vënë në dukje zhvillimin e agroturizmit dhe potencialin e jashtëzakonshëm që ofron kjo perlë alpine e veriut të Shqipërisë.

“Mes natyrës së paprekur, biodiversitetit të pasur dhe peizazheve mahnitëse alpine, bujtina “Kelmendi”, e mbështetur nga AZHBR përmes Skemës Kombëtare të Mbështetjes, është shndërruar në një model të suksesshëm të agroturizmit në zonë”, u shpreh Rama.

Sipërmarrësi Dod Gjerkaj ka ngritur një aktivitet ku ndërthuren mikpritja tradicionale e Kelmendit, ushqimi cilësor i përgatitur me produkte të freskëta vendase, si dhe përvojat turistike në natyrë.

Vizitorët, theksoi Rama, kanë mundësi të përjetojnë ecje në shtigje malore, eksplorim të Alpeve Shqiptare dhe eksperienca autentike që e bëjnë Lëpushën një destinacion tërheqës gjatë gjithë vitit.

Kjo nismë konsiderohet një shembull i zhvillimit të qëndrueshëm të turizmit rural dhe malor, duke fuqizuar ekonominë lokale dhe promovuar zonat e veriut si destinacione me potencial të lartë turistik.

Burimi ATSH