FIP Platinum starton të martën në Sheshin Skënderbej, duke e kthyer zemrën e kryeqytetit në arenën e një prej aktiviteteve më të mëdha sportive të padelit.

Kryeministri Edi Rama ndau sot në rrjetet sociale pamje nga ambientet dhe struktura e ngritur në shesh për këtë aktivitet, që këtë vit shtrihet në të gjithë hapësirën e Sheshit “Skënderbej”.

“Shqipëria po bëhet gati të presë një nga eventet më të mëdha të padelit në Sheshin ‘Skënderbej’ në Tiranë, me energjinë, emocionet dhe adrenalinën e FIP Platinum që po afrohen çdo ditë e më shumë”, shkroi Rama.

Kreu i qeverisë njoftoi se eventi do të zhvillohet nga 26 deri më 30 maj, ndërsa hyrja për publikun do të jetë e lirë.

Rikthimi i FIP Platinum në Tiranë pritet të mbledhë sportistë profesionistë dhe adhurues të padelit (sporti që ngjan me tenisin, por luhet në një fushë më të vogël të rrethuar) nga vende të ndryshme, duke sjellë në kryeqytet atmosferën e garës dhe spektaklit sportiv ndërkombëtar.

FIP Platinum është një kompeticion ndërkombëtar i nivelit të lartë në padel, ku garojnë sportistë profesionistë dhe konkretisht Shqipëria prezantohet si vend mikpritës i një eventi sportiv botëror.