Në Bratislavë, ku po merr pjesë në takimin e Grupit “Miqtë e Ballkanit Perëndimor”, ministri për Evropën dhe Punët e Jashtme, Ferit Hoxha u takua me zëvendëskryeministrin dhe ministrin e Punëve të Jashtme dhe Bashkëpunimit Ndërkombëtar të Italisë, Antonio Tajani.

Në takim, Hoxha vlerësoi veçanërisht rolin e qëndrueshëm të Italisë si një nga mbrojtëset më të fuqishme të perspektivës evropiane të Shqipërisë.

Së bashku, theksoi ministri, do të vazhdojmë të forcojmë bashkëpunimin në të gjitha fushat me interes të përbashkët, në dobi të vendeve tona, qytetarëve tanë dhe një Evrope më të fortë.

“Vlerësuam nivelin e lartë të bashkëpunimit dypalësh në një gamë të gjerë fushash, përfshirë dialogun politik të nivelit të lartë, mbrojtjen, energjinë, sigurinë, ndërlidhjen, ekonominë, tregtinë, kulturën dhe shkëmbimet mes qytetarëve tanë”, tha Hoxha.

“Vlerësuam nivelin e lartë të bashkëpunimit dypalësh në një gamë të gjerë fushash, përfshirë dialogun politik të nivelit të lartë, mbrojtjen, energjinë, sigurinë, ndërlidhjen, ekonominë, tregtinë, kulturën dhe shkëmbimet mes qytetarëve tanë.

Gjithashtu, nënvizuam përputhshmërinë tonë të fortë të qëndrimeve mbi çështje kyçe evropiane, rajonale dhe ndërkombëtare, si dhe angazhimin tonë të përbashkët për paqen, sigurinë, stabilitetin rajonal dhe të ardhmen evropiane të Ballkanit Perëndimor”, pohoi ai.

Ministri Hoxha nënvizoi se “Italia mbetet jo vetëm një vend mik, një partner i afërt dhe një aleat strategjik, por edhe një nga mbështetësit më të fortë të Shqipërisë në rrugëtimin tonë drejt anëtarësimit në Bashkimin Evropian”.

“Shpreha mirënjohjen e sinqertë të Shqipërisë për mbështetjen e vazhdueshme, të palëkundur dhe konkrete të Italisë për procesin tonë të integrimit në BE, duke vlerësuar veçanërisht rolin e qëndrueshëm të Italisë si një nga mbrojtëset më të fuqishme të perspektivës evropiane të Shqipërisë, si në planin dypalësh ashtu edhe në kuadër të Bashkimit Evropian”, tha Hoxha, ndërsa cilësoi se ka pranuar ftesën e ministrit Tajani për të vizituar Romën në javët në vijim.

Burimi ATSH