Ministri për Evropën dhe Punët e Jashtme, Ferit Hoxha, në kuadër të mbledhjes së Këshillit të Punëve të Jashtme (FAC) në Bruksel, zhvilloi një takim me ministrin e Punëve të Jashtme të Holandës, Tom Berendsen.

Hoxha bëri të ditur në një postim në rrjetin social X se në takim u vlerësua niveli i shkëlqyer i marrëdhënieve dypalëshe Shqipëri–Holandë dhe u rikonfirmua angazhimi i përbashkët për forcimin e mëtejshëm të bashkëpunimit në fushat politike, ekonomike, të sigurisë dhe çështjeve Evropiane.

Hoxha shprehu mirënjohjen e Shqipërisë për rolin konstruktiv dhe parimor të Holandës në mbështetje të procesit të anëtarësimit në BE, si edhe për angazhimin e vazhdueshëm në promovimin e stabilitetit, shtetit të së drejtës dhe qëndrueshmërisë demokratike në Ballkanin Perëndimor.

Ministri Hoxha gjithashtu ritheksoi vendosmërinë e palëkundur të Shqipërisë për të avancuar negociatat me ritëm ambicioz, përmes zbatimit të reformave konkrete dhe përmbushjes së të gjitha standardeve të kërkuara në një proces të besueshëm dhe të bazuar në meritë.

Hoxha theksoi se, për Shqipërinë, fjalët kyçe mbeten të qarta: reformat dhe zbatimi efektiv i tyre.

“Shqipëria mbetet plotësisht e përkushtuar ndaj rrugës së saj të anëtarësimit në BE dhe ndaj bashkëpunimit të ngushtë e të pandërprerë me të gjithë partnerët evropianë për një Evropë më të fortë, më të sigurt dhe më të bashkuar”, përfundoi Hoxha.

Burimi ATSH