Ministri për Evropën dhe Punët e Jashtme, Ferit Hoxha gjatë vizitës në Bruksel zhvilloi një takim me homologen rumune, Oana-Silvia Țoiu.

Në takim u rikonfirmuan marrëdhëniet e shkëlqyera dhe afatgjata ndërmjet Shqipërisë dhe Rumanisë, duke theksuar vendosmërinë e përbashkët të dy vendeve për të forcuar më tej bashkëpunimin dypalësh në fusha me interes të ndërsjellë dhe në dobi të qytetarëve tanë, bëri të ditur Hoxha në një postim në rrjetin social X.

Hoxha shprehu mirënjohjen për mbështetjen e vazhdueshme dhe të vyer të Rumanisë ndaj procesit të anëtarësimit të Shqipërisë në Bashkimin Evropian, si dhe ritheksoi angazhimin e Shqipërisë për intensifikimin e bashkëpunimit në funksion të stabilitetit rajonal, forcimit të ndërlidhjes dhe të ardhmes evropiane të Ballkanit Perëndimor.

Hoxha theksoi se diskutimi vuri gjithashtu në pah rëndësinë e forcimit të bashkëpunimit në arsim, të shkëmbimeve ndërmjet njerëzve, si dhe të bashkëpunimit ekonomik e tregtar, me qëllim shfrytëzimin e plotë të potencialit të madh të partneritetit tonë dypalësh.

“Në këtë drejtim, ramë dakord të forcojmë më tej bashkëpunimin kulturor si një mënyrë kuptimplotë për të thelluar miqësinë dhe partneritetin afatgjatë ndërmjet vendeve tona, si një investim i rëndësishëm në të ardhmen tonë të përbashkët evropiane dhe në marrëdhëniet ndërmjet popujve tanë”, përfundoi Hoxha.

Burimi ATSH