Kombëtarja kuqezi do të luajë nesër në “Air Albania”, në orën 20:45 ndaj Letonisë ndeshjen e vlefshme për kualifikueset e Botërorit 2026.

Në prag të kësaj sfide, trajneri Silvinjo dhe kapiteni Berat Gjimshiti dolën në konferencën zyrtare për media, të zhvilluar pasditen e sotme në stadiumin “Air Albania”.

Trajneri Silvinjo theksoi se ndeshja e nesërme është shumë e rëndësishme dhe skuadra do të hyjë në fushë për të fituar.

Duke vlerësuar kundërshtarin, ai tha se ndeshja e nesërme do të jetë ndeshje e ndryshme nga miqësorja me Gjibraltarin. “Letonia është ekip fizik, i organizuar, që lufton gjithmonë për topin, qëndrojnë në lojë, luftojnë. Janë të mirë sa u takon goditjeve standarde dhe kanë pasur aksione të tilla dhe kanë pasur rezultat”, tha Silvinjo.

Trajneri u shpreh se ende nuk e ka vendosur formacionin, por njoftoi se do të ketë ndryshime si në mbrojtje, edhe në sulm. Pas seancës së fundit stërvitore do të vendoset edhe formacioni.

Silvinjo e vlerësoi “shumë të rëndësishme” përballjen me Letoninë.

“Është një ndeshje kyçe me Letoninë, shumë e rëndësishme, duhet të përgatitemi të bëjmë një paraqitje të mirë, të luajmë 90 minuta dhe të tentojmë ta fitojmë në këtë ndeshje”, tha ai.

Edhe kapiteni kuqezi Berat Gjimshiti tha se skuadra është përgatitur për të dhënë maksimumin nesër dhe për të marrë tri pikët në këtë ndeshje.

“Ekipi është përgatitur mirë. Kemi pasur edhe kohë për të përgatitur këtë ndeshje. Nuk do të jetë e thjeshtë, por jemi pozitivë për ndeshjen nesër. Ndjejmë presion, sepse nëse në çdo ndeshje ke presion, përqendrimi është më i lartë. Të marrim tre pikët nesër, që janë të nevojshme për të vazhduar rrugëtimin për t’u kualifikuar”, tha ai në konferencën e sotme për shtyp.

Kapiteni Gjimshiti kishte edhe një mesazh për tifozët kuqezi. “Do japim 100% për të realizuar këtë ëndërr, siç e kemi kaluar për dy Europianët. Kualifikimi në Botëror do të ishte historik për të gjithë shqiptarët. Jemi gati për nesër, do japim gjithçka për tri pikët, do japim maksimumin”, tha ai.

Burimi ATSH