Drejtori i përgjithshëm i Policisë së Shtetit, Drejtues Madhor Ilir Proda, zhvilloi sot një takim me zëvendësambasadoren e Mbretërisë së Bashkuar në Tiranë, Mia Marzouk dhe me shefin e Projekteve në Ambasadën e Mbretërisë së Bashkuar në Tiranë, Simon Charters.

Në njoftimin e Policisë së Shtetit, thuhet se qëllimi kryesor i takimit ishte thellimi i bashkëpunimit në funksion të modernizimit të Policisë së Shtetit dhe përmirësimit të performancës në sektorin e sigurisë publike, përmes rritjes së integritetit, profesionalizmit dhe efektivitetit në luftën kundër krimit.

Sipas Policisë, rezultatet e deritanishme të këtij partneriteti kanë qenë të prekshme dhe domethënëse si aksione të suksesshme kundër grupeve të krimit të organizuar me mbështetjen e ekspertizës britanike; është krijuar një program i ri trajnimi për drejtuesit e lartë të Policisë, si dhe është rritur besimi i qytetarëve te Policia e Shtetit.

“Ndërkohë palët mirëpresin bashkëpunimin me BE-në, për reformën policore, si dhe vijimin e projektit të Policisë Shkencore”, cilësohet në njoftim.

Gjithashtu u konfirmua angazhimi dypalësh për të vijuar bashkëpunimin në funksion të ndërtimit të një shërbimi policor gjithnjë e më profesional në shërbim të qytetarëve.

Burimi ATSH