Zëvendëskryeministrja, njëherësh ministre e Inftrastrukturës dhe Energjisë Belinda Balluku informoi sot se 10% e totalit të energjisë në vend prodhohet sot nga parqet fotovoltaike.

Në një videomesazh nga Parku fotovoltaik në Karavasta, inauguruar dje me pjesëmarrjen e autoriteteve dhe përfaqësuesve të lartë të kompanisë, Balluku theksoi se, “ky është një investim i realizuar nga kompania ekselente franzece “Voltalia”.

Ajo e cilësoi këtë projekt një hap të rëndësishëm, në diversifikimin e energjisë, kur në vitin 2013 kjo shifër ishte 0.

Balluku vuri në dukje se, Parku diellor i Karavastasë, më i madhi në Ballkan, dhe një sërë nuklash të tjera energjetike në të gjithë vendin kanë rritur kapacitetet prodhuese.

“Brenda vitit 2030 synojmë që 30% e energjisë në vend të prodhohet nga parqet diellore. Përmes diversifikimit të burimeve, rrisim kapacitetet. Shqipëria do të kthehet në eksportuese të energjisë”, deklaroi Balluku.

Sipas saj, sot një sërë kompanish ndërkombëtare kanë ardhur në Shqipëri duke treguar besim tek Shqipëria për të investuar në rinovimin e energjisë dhe nëse do të kemi një vit të thatë, ashtu siç duket se do të jetë 2025, nuk jemi në ankthin nga çmimi i energjisë së importit pasi kemi energjinë solare, duke bërë kështu një faktor të rëndësishëm midis prodhimit të energjisë nga hidrocentralet dhe energjisë nga parqet fotovoltaike.

Balluku tha se, “kjo është Strategjia Kombëtare e energjisë që do ta bëjë Shqipërinë një vend eksportues neto të energjisë dhe Strategjia që uli për herë të parë çmimin e energjisë për qytetarët”.

Burimi ATSH