Paraditen e sotme, me rastin e 112-vjetorit të krijimit të Policisë së Shtetit, ministri i Brendshëm, Ervin Hoxha dhe drejtori i Përgjithshëm i Policisë së Shtetit, Ilir Proda, së bashku me familjarë të Dëshmorëve të Policisë, vendosën kurora me lule, në memorialin përkujtimor të Dëshmorëve të Policisë së Shtetit, të rënë në krye ose për shkak të detyrës.

“Në ditën e 112-vjetorit të krijimit të Policisë së Shtetit, nderojmë kujtimin e Dëshmorëve të Atdheut, që kanë dhënë jetën për ruajtjen e rendit dhe sigurisë. Kurorat në Memorialin e të rënëve pranë Akademisë së Sigurisë, janë simbol i respektit dhe mirënjohjes për sakrificën e tyre sublime. Punojmë çdo ditë për një Polici më të fortë, pranë qytetarëve dhe në shërbim të ligjit. Lavdi dhe mirënjohje të përjetshme”, u shpreh ministri Hoxha në një postim në rrjetet sociale.

Ndërsa Drejtori i Përgjithshëm shprehu mirënjohjen e pakufishme dhe nderimet më të larta, për Dëshmorët e Policisë së Shtetit, njëkohësisht Dëshmorë të Atdheut, gjaku i të cilëve qëndron në flamurin kombëtar dhe në themelet e kombit shqiptar.

Gjithashtu, Proda u shpreh se, “kujtimi dhe emri i secilit prej ish-kolegëve të rënë gjatë përballjes me krimin, është një motiv i fortë pse Policia e Shtetit është sot më e angazhuar se kurrë, për ta ruajtur të denjë simbolin kombëtar, jetën dhe pronën e çdo qytetari”.

Burimi ATSH