Komisioneri Qendror i Zgjedhjeve, Ilirjan Celibashi priti sot në një takim ambasadorin britanik në Tiranë, Nicholas Abbott me të cilin diskutoi mbi përgatitjet e KQZ për zgjedhjet për Kuvendin e Shqipërisë të datës 11 maj 2025.

Diskutimi mes Celibashit dhe Abbott u përqendrua në parandalimin e krimeve zgjedhore, luftën kundër blerjes së votave, parandalimin e keqpërdorimit të burimeve shtetërore, si dhe garantimin e integritetit të kandidatëve.

“Pasi diskutuam mbi zhvillimet dhe mjedisin politik në këtë periudhë parazgjedhore, u thelluam mbi temën e votimit nga jashtë dhe sfidat e organizimit të këtij procesi. Ndamë pikëpamjet dhe përpjekjet tona mbi çështje me rëndësi si masat e marra për parandalimin e shitblerjes së votës, shmangies së abuzimit të burimeve shtetërore në fushatë dhe rritjen e rolit të institucioneve të tjera në luftën kundër krimeve zgjedhore”, u shpreh Celibashi.

Po ashtu, u diskutua edhe mbi plotësimin nga ana e KQZ të rekomandimeve të OSBE/ODIHR dhe nevojës së implementimit të plotë të rekomandimeve që kërkojnë ndërhyrje legjislative nga Kuvendi.

“Diskutuam në detaje për risitë e Platformës së Raportimit Financiar dhe promovimin e rolit mbikëqyrës të shoqërisë civile mbi financimet zgjedhore. Dakordësuam rëndësinë unike të procesit të ardhshëm zgjedhor që lidhet me anëtarësimin e plotë të Shqipërisë në BE”, theksoi komisioneri.

Ambasadori Abbott e siguroi Komisionerin për mbështetjen e palëkundur të Mbretërisë së Bashkuar ndaj Komisionit dhe rolit të tij të rëndësishëm në garantimin e standardeve demokratike në zgjedhjet e ardhshme.

“Si partnerë, Mbretëria e Bashkuar mbetet e angazhuar për të bashkëpunuar ngushtë me Komisionin Qendror të Zgjedhjeve për të mbështetur rrugëtimin demokratik të Shqipërisë dhe bën thirrje që të gjitha institucionet të mbështesin zgjedhje të lira dhe të ndershme”, thuhet në deklaratën e ambasadës në një postim në rrjetet sociale.