Kryetarja e Kuvendit, Lindita Nikolla u takua sot me pedagogë e studentë të Fakultetit të Ekonomisë të Universitetit të Tiranës.

Në takim ishin të pranishëm edhe kryetari i Komisionit të Ekonomisë, Eduard Shalsi, zëvendëskryetarja e këtij Komisioni, Blerina Gjylameti dhe sekretarja Enslemvera Zake.

Në vijim të këtij takimi, Kryetarja e Kuvendit, Lindita Nikolla dhe dekani Dhori Kule, nënshkruan Marrëveshjen e Bashkëpunimit mes Kuvendit dhe Fakultetit të Ekonomisë.

Në fjalën e saj në këtë takim, Kryetarja Nikolla nënvizoi se, “Marrëveshja e Bashkëpunimit mes Kuvendit dhe Fakultetit të Ekonomisë, në vijim të Marrëveshjes që kemi nëshkruar para disa vitesh me Universitetin e Tiranës, është në interes të dyanshëm. Kuvendi do të tërheqë mendimin e kualifikuar shkencor ekonomik në ligjbërje e kontroll parlamentar, ndërsa Fakulteti do të ketë më shumë akses në programet për fuqizimin e ekonomisë e mirëqenies.

Nikolla gjithashtu, vlerësoi rolin dhe kontributin e Fakultetit të Ekonomisë në përgatitjen e ekonomistëve dhe zhvillimin e mendimit shkencor ekonomik.

“Vendi dhe qeverisja kanë nevojë për mendimin ekonomik, sidomos në ndihmë të rritjes së produktivitetit të ekonomisë, sidomos nxitjen e zhvillimit të sektorëve të prodhimit “made in Albania”, tha Nikolla.

Kryetari i Komisionit të Ekonomisë, Eduard Shalsi, nënvizoi se, rritja e eficiencës së punës së Kuvendit dhe përmirësimi i cilësisë së ligjeve kanë nevojë edhe për mendimin e kualifikuar shkencor ekonomik dhe Kuvendi po e tërheq dhe po e shfrytëzon këtë mendim në procesin e ligjbërjes.

(Marrë nga ATSH)