Departamenti për Kërcënimet Ndërkombëtare i Sekretariatit të OSBE-së dhe Prezenca e OSBE-së në Shqipëri i dhanë Policisë së Shtetit licenca shtesë të softuerit për analizën e krimit dhe zhvilluan një trajnim të avancuar në Tiranë.

Duke u mbështetur në programin e mëparshëm të trajnimit hyrës, mbajtur në dhjetor 2023, kjo nismë e organizuar nga data 26 shkurt deri më 8 mars 2024, u përshtat për 40 analistë të rinj të Drejtorisë së Inteligjencës dhe Arkivave Kriminale të Policisë së Shtetit.

Drejtori i Departamentit të Policisë Kriminale, Neritan Nallbati tha se trajnimi shënon një moment të rëndësishëm në bashkëpunimin e vazhdueshëm mes OSBE-së dhe Policisë së Shtetit.

“Ai jo vetëm përforcon themelet e hedhura nga përpjekjet e mëparshme për ngritjen e kapaciteteve, por gjithashtu i siguron Policisë së Shtetit mjete softuerike kritike, përfshirë licencat i2 Analyst’s Notebook. Këto licenca do t’u mundësojnë analistëve të zbatojnë aftësitë e tyre të reja të fituara në praktikë, duke përmirësuar më tej efikasitetin dhe efektivitetin operativ”, tha Nallbati.

Veprimtaria ishte pjesë e projektit të OSBE-së “Ndërtimi i kapaciteteve policore të udhëhequra nga inteligjenca në nivel rajonal dhe kombëtar në zonën e OSBE-së”, i cili financohet nga Gjermania.