Akademiku Uran Ferizi, me një karrierë të shkëlqyer sa në Britani dhe në SHBA do të shërbejë në postin e diplomatit, që do duhet të vendosë ura të forta komunikimi mes Shqipërisë e Britanisë së Madhe, sidomos në çështjen madhore të emigracionit.

Kështu u shpreh sot Këshilli Koordinues i Diasporës, në një postim në rrjetet sociale.

“Ferizi i përket atij grupi të komunitetit që sakrifikon pa hezitim të lërë mënjanë arritjet e tij në fushën profesionale për t’i shërbyer të dy vendeve ku është brumosur”, theksoi Këshilli Koordinues i Diasporës.

Sipas këtij këshillim, me angazhimin e ri në sferën diplomatike, Ferizi jo vetëm që merr përsipër rolin e përgjegjshëm të përfaqësimit të interesave kombëtare të Shqipërisë e shqiptarëve, por njëkohësisht do të shërbejë në vendin ku iu ofruan shanset e edukimit e të kualifikimit, duke shpërblyer sot atdheun e tij të dytë, një detyrë që kontribuon në të mirën e dobishme të dy vendeve.

“Ne falënderojmë Britaninë e Madhe për faktin që një Britaniko-Shqiptar, me një bagazh të gjerë të botëkuptimit jo vetëm të komunitetit Shqiptar por edhe atij Britanik, është pranuar pa paragjykim të kryejë detyrën e tij. Tipari më i mrekullueshëm i emigrantëve është dashuria dhe respektimi i thellë i të dy vendeve që u përkasin”, u shpreh Këshilli Koordinues i Diasporës.

Ky këshill ka objektiv prioritar evidentimin e vlerave si dhe mbështetjen e vazhdueshme të diasporës shqiptare, do të mbetet zëri i fuqishëm e i paanshëm për sigurinë e drejtësisë ndaj shqiptarisë kudo në botë.

“Ne festojmë arritjet e emigrantëve shqiptarë, të cilët me shumë punë, përkushtim dhe sakrifica, ia kanë dalë të jenë të suksesshëm në botë dhe të japin kontributin e tyre të çmuar”, tha Këshilli Koordinues i Diasporës.

Uran Ferizi do të jetë ambasadori i ardhshëm i Shqipërisë në Londër.