Kryetari i Dhomës së Tregtisë dhe Industrisë Tiranë, Nikolin Jaka priti sot në një takim ambasadorin e ri të Katarit në Shqipëri, Jabor Ali Hussein Al Hawashela Al Dossari.

Sipas DHTI-së, diskutimet u përqëndruan në intensifikimin e marrëdhënieve tregtare mes dy vendeve dhe nxitjen e investimeve me përfitime të ndërsjella në sektorët strategjikë.

Duke u fokusuar në nisma konkrete, u ra dakord që prioritet për vitin e ardhshëm të jetë ndërmarrja e aktiviteteve të përbashkëta, ku u parashtruan plane për organizimin e panaireve dhe vizitave të ndërsjella në nivel të misioneve të biznesit.

Në funksion të vazhdimësisë së bashkëpunimit dypalësh, u propozua edhe nënshkrimi i një marrëveshjeje mirëkuptimi ndërmjet dhomave të të dyja vendeve, si hap i parë drejt një partneriteti të frytshëm e afatgjatë.