Nga Dash Frashëri

12 piktorë. 48 peizazhe.

Kjo është ajo që të ofron ekspozita “Plein Air” në edicionin e saj të 9-të, e hapur të enjten e 7 dhjetorit, në sallën kryesore të Muzeut Historik Kombëtar.

Një koleksion i bukur me vepra të përzgjedhura nga krijimtaria e këtij viti e artistëve: Agim Kadillari, Agim Dervishi, Anastas Kostandini, Agron Polovina, Buron Kaceli, Kujtim Buza, Pashk Pervathi, Nikolin Ivanaj, Rikarda Nova, Sadik Kasa, Sefedin Stafa, Xheneta Kadillari dhe Zaim Elezi.

“Janë 12 artistë, 12 shpirtra krijues të plenerit”, i quajti kuratori i njohur Ph.D. Oltsen Gripshi.

“Plein air” është ekspozita e bukurive natyrore shqiptare, tha piktorja Xheneta Kadillari, në fjalën e saj të hapjes.

Një udhëtimi artistik në të gjithë Shqipërinë. E përjetimeve të drejtpërdrejta të autorëve me peizazhin magjik që ata kanë përzgjedhur, për ta piktuar dhe përcjellë publikut.

Artistët pjesëmarrës prezantohen secili me nga katër punime në pikturë, me një niveli të lartë interpretimi figurativ.

Me kompozime të bukura, penelata dinamike dhe ekspresive, kolorit harmonik. Me gjithka që e bën një profesionist, të krijojë arti e tij të bukur.

Piktura që mishërojnë emocione, ngjyra, e dinamikë qetësuese.

Nga viti në vit ekspozitat e “Plein Air” kanë ardhur duke formuar kualitete më të larta artistike. Në këtë mënyrë sjellin dhe risi, sepse çdo nivel i mirë është një e re pozitive për jetën artistike dhe kulturore të vendit tonë.

“Mjeshtri i Madh”, Pashk Përvathi, vjen me katër peizazhe shumë të bukura. Piktori i mirënjohur tashmë e ka konsoliduar stilin e tij.

Edhe Sefedin Stafa me koloritin e tij është lehtësisht i dallueshëm dhe vjen me katër vepra të bukura, njëra prej tyre edhe nga Lumi i Vjosës, në Përmet, lumin që ia njoh çdo pikë dhe ku kam bërë not për herë të parë, pasi është qyteti im i lindjes.

Anastas Konstandini, Tasoja i famshëm, vjen për herë të parë në grupimin “Plein Air”, me katër punë të bukura.

Zaim Elezi, një mik i hershëm dhe shumë pozitiv, vjen me peizazhet e tij më të freskëta, me dashurinë për blunë e detit.

Piktori i njohur beratas, Agron Polovina ofron për artdashësit katër punët e tij.

Bashkëshortët Kadillari, Agimi dhe Xheneta, dallohen qartësisht nga njëri-tjetri, kur bëhet fjalë për paletën e peizazhit. Secili me veçantitë e tij.

Rikarda Nova vjen e ngrohtë me punët e saj, ku dallohet një Berat i përflakur me një të kuqe të bukur.

Agim Dervishi ka kolorit shumë të veçantë.

Sadik Kasa të mahnit me liqenin e tij në Belsh.

Buron Kaceli është një veteran i peizazhit.

***

Artdashësit e ditës së parë janë të shumtë!