Presidenti i SHBA-së, Joe Biden u bëri thirrje liderëve botërorë që të ngrihen kundër Rusisë dhe të mbështesin sovranitetin e Ukrainës, në një fjalim të fuqishëm në Asamblenë e Përgjithshme të OKB-së.
“Rusia beson se bota do të lodhet dhe do ta lejojë atë të brutalizojë Ukrainën pa pasoja”, tha ai në selinë e OKB-së në Nju Jork, ku merrte pjesë edhe presidenti ukrainas Volodymyr Zelensky.
“Por unë ju pyes këtë: nëse ne braktisim parimet thelbësore të Kartës së OKB-së për të qetësuar një agresor, a mundet ndonjë shtet anëtar në këtë organ të ndihet i sigurt se është i mbrojtur? Nëse lejojmë që Ukraina të ndahet, a është pavarësia e ndonjë kombi e sigurt?”
Biden tha se komuniteti ndërkombëtar duhet të ngrihet kundër këtij agresioni të zhveshur sot për të penguar agresorët e tjerë të mundshëm nesër.
Ky është samiti i dytë i Asamblesë së Përgjithshme të OKB-së të liderëve botërorë që zhvillohet që nga pushtimi i përgjithshëm i Rusisë ndaj fqinjit të saj në shkurt 2022.
Nga e marta e në vazhdim, më shumë se 140 kryeministra dhe krerë shtetesh do të mbajnë fjalime në Debatin e Përgjithshëm.
Zelensky, i cili po merr pjesë personalisht në ngjarjen në Nju Jork për herë të parë që nga shpërthimi i luftës, ka të ngjarë të tërheqë vëmendjen më të madhe, dhe të marrë pjesë në një seri takimesh.
