Kryetarja e Kuvendit, Lindita Nikolla, e shoqëruar nga Kryetarja e Komisionit të Ligjeve Klotilda Bushka dhe Zëvendëskryetarja Dhurata Çupi, u takua sot me Presidenten e Asamblesë Parlamentare të OSBE, Margareta Cederfelt.

Gjatë takimit u diskutua mbi bashkëpunimin e Shqipërisë me OSBE-së. Kuvendi ka një bashkëpunim të shkëlqyer me Prezencën e OSBE në Tiranë. Nëpërmjet këtij bashkëpunimi po rritet transparenca, modernizohen shërbimet parlamentare, zhvillohen kapacitetet dhe po krijohet një kulturë e re e zbatimit të programeve dhe projekteve, me impakt në rritje për përmbushjen me sukses të funksioneve të Kuvendit.

Shqipëria dhe Suedia kanë drejtuar OSBE-në në dy vite të vështirë, 2020 dhe 2021, kur kërcenimet për paqen, sigurinë dhe demokracinë, u mpleksen edhe me rreziqet e pasojat prej pandemisë.

“Pas përfundimit të reformës territoriale, po Shqipëria po vijon me reformën në drejtësi dhe rrëzimin e miteve dhe kulturës së pandëshkuëshmerisë, po thellojmë luftën kundër korrupsionit dhe krimit të organizuar”, theksoi Nikolla.

Nikolla dhe drejtuesit e Komisionit të Ligjeve, Kryetarja Klotilda Bushka dhe Zëvendëskryetarja Dhurata Çupi, shkëmbyem mendime me Presidenten Cederfelt për avancimin e reformës elektorale, mbi bazën e rekomandimeve të OSBE/ODIHR.

Duke iu referuar zgjedhjeve vendore të 14 majit, Nikolla vuri në dukje nevojën për “përkthimin” e rezultateve të tyre në përgjegjësi qeverisëse për zhvillimin qyteteve dhe komuniteteve lokale.

Presidentja e Asamblesë Parlamentare të OSBE, Margareta Cederfelt, vlerësoi arritjet e Shqipërisë në thellimin e reformave, kontributin si anëtare aktive e OSBE-së në mbrojtje të sigurisë e të paqes.

Presidentja Cederfelt nënvizoi se, OSBE, organizatat ndërkombëtare dhe komuniteti ndërkombëtar duhet të mbështesin luftën e drejtë të Ukrainës dhe të ndjekin me vëmendje zhvillimet në Ballkanin Perëndimor, për të garantuar të ardhmen e popujve dhe sigurinë e paqen në rajon.

Kryetarja Nikolla nënvizoi se, lufta në Ukrainë është një sfidë e madhe për rajonin, BE, ShBA, NATO, OKB, OSBE dhe gjithë qeveritë që punojnë për sigurinë dhe paqen. Qëndrimi i Shqipërisë ndaj luftës në Ukrainë është aktiv dhe i qartë, në një linjë me BE, SHBA dhe NATO. /ATSH