Ministrja për Evropën dhe Punët e Jashtme, Olta Xhaçka theksoi sot se stabiliteti në rajonin e Ballkanit duhet të mbështetet fuqimisht nga Bashkimi Evropian.

Në një postim në rrjetet sociale Xhaçka ndau momente nga takimet e nivelit të lartë që ka zhvilluar në Bruksel.

“Diskutim konstruktiv në Bruksel me ministrat e Jashtëm të BE-së dhe Ballkanit Perëndimor mbi sfidat e përbashkëta të sigurisë dhe mënyrat se si të forcojmë bashkëpunimin tonë. Stabiliteti në rajonin tonë është kritik në kontekstin aktual të sigurisë dhe duhet të mbështetet fuqimisht nga BE-ja”, tha Xhaçka.

Ministrja Xhaçka po merr pjesë sot në takimin informal të ministrave të Jashtëm të vendeve anëtare të BE me ministrat e Jashtëm të vendeve të Ballkanit Perëndimor, në kuadër të Këshillit të Çështjeve me Jashtë të BE-së, në Bruksel.

Në këtë takim po trajtohen çështje të bashkëpunimit rajonal, integrimit evropian, çështje të sigurisë etj. Xhaçka ka në axhendë edhe takim dypalësh me Komisionerin Evropian për Fqinjësinë dhe Zgjerimin, Oliver Varhelyi. /ATSH