Në vijim të konferencës shkencore ndërkombëtare “Shqiptarët dhe hebrenjtë gjatë Luftës së Dytë Botërore”, organizuar nga Akademia e Shkencave e Shqipërisë dhe “Israeli House of Albania”, në kuadër të “Javës së Israelit në Shqipëri”, konferencë ku morën pjesë studiues nga Izraeli, Britania e Madhe, Gjeorgjia, Australia dhe Zvicra, sot në mesditë akad. Skënder Gjinushi, kryetar i ASHSH, priti delegacionin zyrtar të Shtetit të Izraelit, në përbërje të të cilit kishte ministra, deputetë të Knesset-it, kryetarë të organizatave ndërkombëtare dhe të kujtesës historike për Holokaustin (Shoah).

Delegacioni, i kryesuar nga z. Yaakov Hagoel, President i World Zionist Organization, kishte në përbërje edhe zz. Czami Frej, Itzik Shmuel e Omar Bar Tev, ministra; Michel Biton e Hilik Bar (deputetë të Knesset-it) dhe Joel Herzog, president i Aleancës për Izraelin në Zvicër (vëlla i Presidentit të Izraelit Herzog). Ky është delegacioni i nivelit më të lartë që ka vizituar ndonjëherë Shqipërinë nga Shteti i Izraelit.

Gjatë takimit u diskutua për marrëdhëniet historike midis shqiptarëve dhe hebrenjve, për mbijetesën e tyre të përbashkët gjatë nazifashizmit, për ngjashmëritë në kronologjinë e zhvillimit dhe në cilësi të tjera. Kryetari Gjinushi i njohu miqtë me qendrimin e shqiptarëve ndaj hebrenjve gjatë Holokaustit dhe me rolin e Akademisë së Shkencave për njohjen e kësaj faqeje të historisë së Shoah dhe të antifashizmit në Shqipëri. Gjithashtu u diskutua për mundësitë e bashkëpunimit ndërakademik dhe ndëruniversitar në vijim.

Nga ana e tyre miqtë nga Izraeli vlerësuan ngrohtësinë e pritjes nga populli shqiptar në histori dhe gjatë dy ditëve të qëndrimit në Tiranë dhe u bënë të njohura ndihmesat e institucioneve shkencore të Izraelit për bërjen të njohur të historisë së hebrenjve në Shqipëri.

Në vlerësim të këtyre ndihmesave juria e ngritur me vendim të Kryesisë i akordoi z. Yaakov Hagoel mirënjohjen “Nderi i Akademisë së Shkencave të Shqipërisë” me këtë motivacion:

Për ndikimin e tij personal për promovimin dhe ndërkombëtarizimin e qendrimit human të shqiptarëve për pranimin, strehimin dhe marrjen në mbrojtje të hebrenjve gjatë Luftës së Dytë Botërore; për njohjen dhe vlerësimin e kontributit të Akademisë së Shkencave të Shqipërisë në dobi të ndriçimit të historisë së Shoah; për meritat e tij të veçanta në veprimtarinë e vijueshme profilaktike ndaj krimeve kolektive për shkak të urrejtjes racore, etnike, fetare dhe kulturore; që me autoritetin e tij personal si një prej figurave më me ndikim në Botë në krye të institucioneve dhe organizatave më prestigjioze që ka drejtuar e drejton ka kontribuuar për evidencimin e përmasave të Holokaustit shkaktuar nga Anti-Semitizmi.

Z.Yaakov Hagoel, President i World Zionist Organization, la një shënim në hebraisht në “Librin e Artë” të Akademisë së Shkencave.