Në panarin “Tourism Fair Albania”, ministri i Turizmit, Kulturës dhe Sportit, Blendi Gonxhja u takua me kryetarin e Komunës së Strugës, Mendi Qyra dhe kryetarin e Komunës së Ulqinit Genci Nimanbegun.

Gonxhja tha se me Qyrën dhe Nimanbegun pati diskutime mbi forcimin e bashkëpunimit në fushën e turizmit dhe kulturës, si dhe mbi rëndësinë e përmirësimit të infrastrukturës dhe lehtësimit të lëvizjes ndërkufitare, në funksion të rritjes së shkëmbimeve dhe zhvillimit të qëndrueshëm rajonal.

Ministri Gonxhja tha se njëherësh u nda edhe një vizion i përbashkët për promovimin e rajonit si një hapësirë turistike e integruar dhe konkurruese, me ofertë gjithëvjetore.

Panairi “Tourism Fair Albania” në Tiranë ka në qendër rëndësinë e eventeve që bashkojnë institucionet publike, sektorin privat dhe partnerët ndërkombëtarë për të forcuar bashkëpunimin dhe zhvillimin e qëndrueshëm të turizmit.

Panairi mirëpret 141 ekspozues, 40 blerës ndërkombëtarë nga e gjithë bota, përfshirë tregje me potencial të lartë si SHBA, Kanada, Japoni, Kinë dhe Tajlandë, si dhe tregje kyçe europiane si Anglia, Gjermania, Irlanda dhe Franca,17 panele diskutimi, 70 folës dhe ekspertë, 813 takime biznesi në platformën digjitale b2balkan.

Marrë nga ATSH